BASE sa labing uwahi nga datus sa human immunodeficiency virus (HIV) sa nasod, anaa na lang sa top 6 ang Central Visayas gikan sa naandan nga top 4, apan alang lang sa Marso.
Matod sa Department of Health (DOH) 7 nga tungod kay nisaka ang kaso sa regions 11 ug 6 hinungdan nga niubos ang ranking sa Central Visayas.
Apan kon basehan ang kaso sukad niadtong 1984 hangtod Marso karong tuiga, nagpabilin ang Central Visayas nga anaa sa top 4 diin natala ang 5,835 ka kaso.
Si HIV/Aids program coordinator Dr. Van Phillip Baton nibutyag sa Superbalita Cebu nga usa sa hagit nila kining pagpatambal sa mga nagpositibo sa HIV.
Sa uwahing datus sa DOH, anaa lang sa 2,175 ang nagpatambal o kining nipaubos sa antiretroviral therapy sa Central Visayas.
“Ang challenge karon is ang pag-enroll sa mga na diagnosed because only 2,175 of the 5,835 is very low. We should enroll 90% of them,” si Baton nagkanayon.
Nagpabilin ang stigma ug discrimination nga rason kon nganong aduna’y pipila nga di mopaubos sa ART.
“Ang mentality nga mas maayo pag mamatay kaysa mahibaw-an nga HIV positive or sila mismo naghuna-huna nga mas maayo pay mamatay nalang kay feeling nila it’s their own fault. Murag self induced stigma and discrimination,” pasabot ni Baton.
Tambag ni Baton sa nagpositibo nga di mahadlok tungod kay ubos sa balaod, protektado sila ug di mamahimo nga ipahibawo nga positibo sila.
“To think of their health nga being positive is not the end of the world. They do not have to die because free ang tambal and the new HIV law RA 11166 ensures that their rights are protected,” dugang niya. (HBL)