SUPERBALITA CEBU

Gatusan misungasong sa baha

LAWOM: Sa pagbunok sa uwan niadtong Biyernes sa gabii, di lang ang karsada sa Bulacao, Talisay City ang gibahaan, apil na ang pipila ka mga dapit sa Paradise 2, KInasang-an Pardo, Dakbayan sa Sugbo. Lawom ang tubig kay ang ubang bahin moabot na sa ilokan sa tawo ang tubig. Estorya sa pahina 2. (Alan Tangcawan)

DAGHANG natanggong nga mga motorista ug manakayay ilabi tong padulong sa habagatang Sugbo human nibunok ang kusog nga uwan nga miresulta sa lawom nga baha ug kapin tulo ka oras nga pagkabara sa trapiko sa Barangay Bulacao, siyudad sa Talisay niadtong Biyernes sa gabii, Hunyo 14.

Ang kusog nga uwan ug pagbaha nga nasinati sa lainlaing parte sa Sugbo nahitabo mga pipila ka oras lang nga nideklarar ang Philippine Atmospheric, Geophysical and Astronomical Services Administration (PAGASA) nga pormal nang nagsugod ang tig-uwan.

Sa iyang bahin, nisaad si Cebu congressman ug Talisay City Mayor-elect Gerald Anthony “Samsam” Gullas nga makigkita siya sa mga opisyal sa Department of Public Works and Highways (DPWH) Second Engineering District aron kapangitaan og paagi unsaon pagsulbad sa suliran sa baha sa maong siyudad.

Nangayo sad og dispensa ang batan-ong Gullas sa tanang mga motorista ug manakayay nga nakasinati ug nahasol sa maong panghitabo.

“I would like to apologize for whatever discomfort or problem that were felt by our constituents and those passing by Talisay City just to get to their respective homes,” sigon ni Gullas sa iyang official Facebook page.

Miubog sa tubig

Si Joey Bonsobre, usa ka factory worker nga nagpuyo sa Barangay Jaclupan, siyudad sa Talisay, nibutyag sa Superbalita Cebu nga halos kapin tulo ka oras siyang naghuwat sulod sa iyang gisakyan nga PUJ tungod kay nangatanggong sila sa baha sa Barangay Bulacao.

Sa iyang kadesperado niini nga makauli sa ilaha, napugos si Bonsobre nga mokuyog sa ubang manguliay nga niubog sa gibahaan nga highway nga niabot pa sa Barangay Tabunok.

“Bahalag nauwanan ko ug naligo ko sa baha, basta makauli lang gyud ko. Pero maayo unta og dili na to mausab kay daghan nahasol atong bahaa,” dugang ni Bonsobre.

Gawas sa mga manakayay, bisag mga motorista wala makatabok sa Barangay Bulacao tungod sa lawom nga baha.

Matod pa ni Ramon Tandog, usa ka habal-habal driver ug lumulopyo sa Barangay Lawaan 3, siyudad sa Talisay, nga naa sa talyer run ang iyang motorsiklo human nasudlan og tubig ang iyang tambutso sa kadesperado nga makauli sa ilaha.

Dugang ni Tandog nga napugos nalang siyag tabok sa baha kay gadali-dali siyag uli kuyog sa iyang asawa.

Unsay solusyon?

Sa iyang pamahayag, si Gullas niingon nga nagkastorya na sila ni DPWH 2nd Engineering District head Leslie Anthony Molina kabahin sa baha.

Gusto unta mahibawo si Gullas kon unsay plano sa DPWH para masolbad ang suliran sa baha sa maong dapit ilabi na nga bag-o pang gibutangan og bag-ong drainage system ang lugar.

Si Molina nipasalig ni Gullas nga makig-alayon siya sa mga contractors niini para masolbad ang maong problema.

Giawhag sad ni Gullas ang DPWH ug lokal nga kagamhanan sa Dakbayan sa Talisay nga makig-alayon para makapangita og solusyon sa suliran sa baha sa maong siyudad.

Dugang ni Gullas nga daling nasolbad ang problema sa baha dapit sa usa ka food strip sa Cebu South Coastal Road tungod sa pakig-alayon sa siyudad ug sa DPWH.

“We hope to see that same dynamics in solving the flooding situation in Barangay Bulacao,” dugang ni Gullas.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph