TAGUM CITY -- Giandam na sa kapulisan sa Tagum City Police Station ang pagpasaka og kasong large-scale estafa batok sa chief executive officer (CEO) sa QuestLink Digital Marketing Services, usa ka investment scheme sa Tagum City nga milayas na.
“Ang i-file gayud sa kadtong mga responsible, which is ang CEO ug ang operation manager, mag-atubangan gyud ni sila’g kaso nga large-scale estafa, non bailable ni siya,” ingon ni Tagum City Police Station spokesperson, Police Captain Anjanette Tirador.
Sumala ni Tirador nga dunay midangop sa ilang buhatan ang coordinator ug agent sa QuestLink nga si Christian Etabes, 23-anyos, taga Surigao City.
Gisaysay ni Etabes nga nabalaka na siya dihang wala na niini ma-contact ang ilang CEO nga si Kenneth Paz Nagas, taga Quezon City ug si Rogie Sabando, operation manager ug trader.
Giingon nga ilang nadala ang salapi nga mokantidad og P200 milyones gikan sa ilang mga investors nga sagad mga residente sa Tagum City ug sa Davao de Oro [kanhi ComVal].
Sa imbestigasyon sa kapulisan, migula nga Hunyo 1, 2019 nagsugod ang investment scheme diin nagsaad kini og 500% nga tubo sa kuwarta sa mga investors sulod lamang sa 15 ka adlaw.
Mga unit sa awtoridad nga gisangunan ni Pangulong Rodrigo Duterte nga mo-imbestiga sa maong kaso padayong naghimo og imbestigasyon ug pagpangalap sa mga reklamo sa katawhan aron tukma nga mapasaka ang reklamo.