HILAK dangoy-ngoy ang atong makita ug mabati sa mga miyembro sa Kapa (Kabus Padatuon) Community Ministry International Inc., sa dihang gimandoan ni Presidente Rodrigo Duterte nga pasirad-an ang operasyon niini lukop nasud.
Si Pastor Apollo C. Quiboloy (ACQ) ang gidakdakan sa mga miyembro sa Kapa tungod kay gipangutana man kini sa pastor sa Kingdom of Jesus Christ, The Name Above Every Name, Inc. sa dihang miduaw ang atong presidente sa iyang Kingdom Ministry.
Sa patas nga pagtimbang-timbang, dili pud nimo mabasol si ACQ tungod kay ang pagparehistro ni Kapa Founder Pastor Joel Apolinario sa Securities and Exchange Commission(SEC) usa man ka ministry kon pundok sa relihiyon, kitang tanan, sayod nga basta religion, tax free na siya, dili maningil ang gobyerno og buhis.
Ang problema, kay walay simbahan si Apolinario diin nagtanyag og "donation" kutob sa magpa-miyembro, apan bisag unsa pa’y relihiyon nimo dawaton ang imong donasyon ug i-negosyo uban sa verbal nga kasabutan nga modawat ka’g 30 porsiyento nga interest kon "blessing" kuno.
Ang donasyon sa relihiyon sa ato nang giingon, dili ka singlon sa gobyerno og buhis, pero ang naka-apan kay wala man gud simbahan nga adunay pangalan sa relihiyon nga adto mosimba ang mga miyembro ni Apolinario ug didto kolektahan og donasyon, bisag pa’g imo nang ikapital og negosyo basta gipaagi og donasyon sa simbahan di ka hilabtan sa gobyerno.
Pero, si Apolinario, wala’y simbahan ug wala’y pangalan sa iyang relihiyon, tungod kay ang Kapa dili pangalan sa simbahan o relihiyon kon dili, Kabus Padatuon, walay paki-alam og unsay relihiyon nimo basta mo-donate ka mokita ka, sa laktud, sa akong pangagpas gihimo niyang ministry aron paglikay nga dili siya makabayad og buhis sa atong gobyerno.
Niining tungora, mura og dunay puntos si ACQ gihaw-as niya ang sa himalatyon nga kalisod ang materyal nga panginahanglan sa mga tawo apan, wala siyay espirituhanong pagtulon-an nga gitudlo sa katawhan agi'g pagtuman sa relihiyon nga iyang giparehistro sa ahensiya sa gobyerno nga mao ang SEC.
Unta, adunay makatambag kang Apolinario nga i-rehistro pag usab nga "investment" total gi-negosyo man gyud niya ang mga donasyon sa katawhan, para pagdawat sa payout sa mga miyembro, kaltasan sa Bureau of Internal Revenue (BIR) og buhis di ba? Tan-awa nang uban nga investment group nga nagpa-rehistro di ba wala man hilabti?
Relihiyon batok relihiyon karon ang nag-away, nadamay na hinuon ang ubang investment nga wa’y labot. Duha lang ang mahimong kapili-an ni Apolinario, una, magbuhat og simbahan, magwali sa espirituhanong aspeto nga ang mga miyembro, magbutang ug unsay pangalan sa relihiyon.
Ikaduha, i-rehistro nga investment purely business ang iyang pagpadagan, bahalag unsang relihiyona kon gusto mang gyud kaha nga makatabang sa mga tawo.
Dili lang nato sagulan og pamolitika nga nag-viral na karon sa social media nga “Apolinario for President sa 2022,” layo rana’s tinuod, daghan pang mahitabo una moabot nang tuiga, kung suportahan sa administrasyon ang ubang investment schemes.
Ayaw dalha sa politika ang problema, ang ilegal sumpuon, ug ang legal palambuon.