Lodging inn gigamit sa notadong drug pusher

WALA kalusot ang usa ka lalaki kinsa gituohang notadong drug pusher ngadto sa operasyon sa otoridad diin gihimo niini ang lodging inn nga maoy lugar hain siya mobaligya og gituohang shabu.

Niadtong Huwebes, Hunyo 13, nasikop ang usa ka Alejandro Bual Fajardo, alyas "Jun Pards" 41-anyos, minyo, residente sa Block 5, Lot 14, Davao Empress Subdivision, Panacan, Davao City.

Nasikop ang suspek sud sa Quality Inn, sa Barangay Lapu-Lapu, Agdao District ning siyudad.

Duha ka mga pakete sa gituohang shabu ang nakuha gikan sa posisyon sa dinakpan ug ang P1, 000 nga marked money.

Giingon nga notadong pusher ang suspek nga maoy tigsuplay sa iyang mga parokyano sa Agdao District.

Ning kasamtangan ang suspek nabalhog sa selda sa Sasa Police Station kinsa pasakaan og kasong pagsupak sa Republic Act 9165 kon Comprehensive Dangerous Drugs Act of 2002 didto sa korte.

Luyo sa sagunsong pagpahigayon og anti-drug operation sa kapulisan, gipanganti karon sa Police Regional Office (PRO)-Davao Region nga di sila mohunong hangtud nga di makab-ot ang gitinguhang drug-free sa dakbayan sa Davao.

Ning bag-o lang, pipila ka mga dapit sa Davao Region ang gideklara nga drug-free sa Philippine National Police (PNP) ug sa Philippine Drug Enforcement Agency (PDEA)-Davao Region.

Sumala sa PDEA-Davao Region nga resulta kini sa padayong pagpakabana sa katawhan nga mosumbong dayon sa mga awtoridad ugaling dunay mamatikdan nga dautang lihok sa mga tawo sa ilang palibot.