SECTIONS
Sunday, July 21, 2019
SUPERBALITA DAVAO

Mga negosyo sa Kapa nakarehistro sa pangalan sa asawa ni Apolinario

DAVAO DEL SUR -- Dako ang katingala sa mga sakop sa Kapa (Kabus Padatuon) Community Ministry International Inc. kun nganong dili sa organisasyon nakarehistro ang negosyo sa ilang mga donasyon.

Nasuta nga sa asawa ni founder Joel Apolinario nakapangalan ang mga negosyo niini.

Naglaum gihapon si Ginang Alicia, 47, sa Matanao, Davao del Sur, nga mauli sa ilang kamot ang ilang donasyon nga P30,000 sa Kapa niadtong buwan sa Mayo.

Aminado ang Ginang nga natingala sab siya kun nganong wala gipangalan sa organisasyon ang mga negosyo sa Kapa nga sa ilang pagtuo kini mao ang ilang donasyon nga gibutang sa ministry.

Niadtong Hunyo 10, gipabuhagay sa Securities and Exchange Commission (SEC) nga sa napulo ka mga negosyo sa Kapa, nakarehistro kini sa ngalan ni Reyna Lobitana Apolinario sama niining mosunod diin napondar gikan tuig 2018 hangtud sa kasamtangan.

Si SEC chairman Emilio Benito Aquino, nagbutyag nga ang mga negosyo gikan sa pagkaon ngadto sa real estate ug mining ang napundar gikan Enero 2018 hangtud Abril 2019 sama sa JoRey Love Bakeshop & Restaurant – Enero 25, 2018; Kapa Minmetals Trading – Hunyo 28, 2018; JoRey Gasoline Station & Convenience Store – Agosot 23, 2018; JoRey Multimedia Production – Oktobre 26, 2018; JoRey Agri Banana Plantation – Nobyembre 14, 2018; Reyna’s Convention Center – Enero 9, 2019; JoRey Fishing Boat – Enero 11, 2019; JoRey Garments Trading – Marso 8, 2019; JoRey Printing Services – Marso 20, 2019; ug JoRey Fuel Trading – Abril 5, 2019.

Sumala sa SEC nga si Reyna mao ang aduna’y kontrol sa pagpadagan sa maong mga negosyo ni Apolinario, kinsa kanhi mananagat ug construction worker sa Bislig, Surigao del Sur.

Gawas sa maong mga negosyo, unang gi-angkon sa Kapa nga napanag-iyahan na nila ang usa ka ospital didto sa Tagum City, Davao del Norte.

Matod ni Aquino nga ang Kapa mao ang labing kadako nga investment scheme sa nasud kinsa nagatanyag og 30-porsyento nga “blessings” gikan sa salaping “donasyon” sa mga miyembro.

Gitataw sab ni Aquino nga sa gipaguwang financial statement sa Kapa niadtong tuig 2017 aduna kini P465, 000 nga gideklarang total assets kun itandi sa P50 bilyones nga investments sa lima ka milyong sakop niini.

Ang SEC nagbutyag nga gikinahanglan nga aduna’y secondary license ang usa ka investment contract kinsa nagtanyag sa investment scheme.

Kahinumdoman, subling gimando ni Presidente Rodrigo Duterte ang pag-aresto sa mga nagpaluyo sa Kapa dihang mibisita kini sa dakbayan sa General Santos niadtong Huwebes, Hunyo 13.

Sukwahi ang kamandoan, sa gipaguwang pahayag ni Pastor Joel Apolinario dihang namulong kini atubangan sa mga sakop nga nag-prayer rally didto sa Acharon Sports Complex sa Gensan kinsa miingon nga gipatawag siya sa presidente alang sa usa ka tigum.

Sayo niini, si National Bureau of Investigation Deputy Director Antonio Pagatpat nagbutyag nga si Apolinaro maoy ilang subject sa gipasakang kaso sa large-scale estafa niadtong tuig 2018 apan nakalingkawas human gi-areglo ang mga biktima.

“We recommended syndicated estafa, large scale. Unfortunately, again the prosecutor downgraded the cases into simple estafa,” asoy ni Pagatpat.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph