TALAGSAON nga talento ang gihatag sa labawng makagagahom kang Daniel Tenio, 18 anyos, usa ka LGBT, taga Barangay Sta. Ana lungsod sa Tagoloan, Misamis Oriental.
Dako ang garbo ug kalipay ni Daniel human nga daghan ang midayeg sa iyang talento sa wall drawing.
Tungod niini, gikahinaman sa duha ka mga dagkong tunghaan sama sa Sta. Ana National High School sa Lungsod sa Tagoloan, ug Indahag National High School ning syudad sa Cagayan de Oro nga magpa wall drawing sa 18 anyos nga artist.
Sa Indahag National High School, moabot sa 28 ka pader ang iyang gi-drawingan nga maoy gitanyag isip usa sa pinakanindot nga tunghaan karong panahona.
"Gamay pako mahilig nako og drawing, bisan unsa gyud akong drawing. Mahilig pod ko magpalit og mga color pens nga mga gamit pang drawing ug mao gyod akong buhaton. Since elementary nako pirme ko paka kuha og award like Best in Art, Artist of the year, anything about art award gitagaan ko ana," matud ni Tenio.
Dugang niini nga nadiskubre pag-ayo ang iyang talento dihang adunay kompetisyon sa ilang tunghaan kalabot sa wall painting ug siya ang gi-anunsiyo nga mananaog.
"Sugod ato naa na dayon magkuha sa akoa, eskwelahan, mga maestra nga gapadrawing personal nila nga gamiton o sa ilang balay," dugang ni Tenio
Expert sab si Tenio sa paint mixing kon diin siya maoy mounay sa pagsagol sa mga kolor aron ma-achieve ang iyang gihuna-huna nga senaryo sa iyang drawing.
Apan sa pakighinabi sa Superbalita, aminado si Daniel nga bagito pa lang siya aron modemand og dagko nga kantidad labina kun adunay magpa-wall drawing kaniya nga mga tunghaan.
Gani, usa ka higala ang miambit kaniya nga modemand na siya og dako nga kantidad kay dili sayon ang pagdrawing ug kahago sa utok sa paghuna huna sa mga senaryo.
Ug kini gitubag ni Daniel nga bagito pa lang siya ug request sa tunghaan ang maong wall drawing nga disenyo.
Hangtod karon, padayon gihapon si Daniel sa pag paningkamot nga maaninag pag ayo ang mga scene aron nindot kini lantawon sa bunbong.
Gibutyag sab niini nga iyang ampingan pag ayo ang talento nga naa siya kay kini usa ka dakong gasa nga gihatag sa Ginoo kaniya.
Andam sab modawat si Daniel sa buot magpa-drawing kaniya pinaagi sa pagkontak kaniya.
Ang wall drawing usa ka pamaagi nga gilusad sa mga tunghaan aron malikayan ang bandalismo sa mga bungbong niini.