USA ka konsehal ang gitumbok ni Mayor Oscar Moreno nga nibabag sa iyang buot pagduso ug mapasa sa Konseho ning siyudad sa Cagayan de Oro.
Kini gibutyag ni Moreno sa iyang mensahe atol sa Adlaw sa Kagawasan ug gitataw pagbalik niadtong Charter Day sa siyudad.
"The mandate is very clear kaabag magtinabangay, regretfully dunay mga measures nako nga giduso sa City Council natingala ako nga gibabagan man sa kauban ra gihapon," mensahe ni Moreno atol sa Adlaw sa Kagawasan.
Apan, giklaro ni Vice Mayor Rainier Joaquin "Kikang" Uy nga walay nagbag-o sa relasiyon tali sa buhatan sa mayor ug sa City Council ug normal lamang kini ilabi na nga naay separation of powers.
Gibutyag sab ni Uy nga normal lang nga adunay check and balance sa gobyerno kay ang tumong mao ang kaayohan sa tanan.
"At least nagpakita nga dili pa ingon nga rubber stamp ang City Council at least naay motindog, at the end of the day ang kataposan ani kaayohan raman gihapon," matud ni Uy.
Dugang ni Uy nga wala matumbok kun kinsa ang gipasabot ni Moreno nga konsehal nga nibabag kaniya ilabi na nga City Council ang gibutyag niini.
Apan kun wala makalusot ang usa ka ordinansa human kini nga mahisgutan ug gi-ingong walay nagbag-o kini tungod kay ang tumong lamang sa tanan nga maserbisyohan ang katawhan.
"Base sa local government code dili gyud na mausab, walay nagbag-o ang bottom line maserbisyohan ang katawhan," dugang niini.