GIPANGHIMAKAK sa kasundalohan ang alegasiyon nga mga peke nga sakop sa New People's Army (NPA) ang nibalik sa sabakan sa gobyerno.
Giingon nga anaa sa 600 kapin na nga mga sakop sa NPA ang nitahan ug nibalik sa sabakan sa gobyerno.
Gibutyag ni Captain Reggie Go, acting spokesperson sa Philippine Army sa 4th Infantry Division (41D) nga taas ang proseso sa pagsuta sa identipikasiyon sa mga nitahan sa gobyerno kini human giingong peke nga mga miyembro sa NPA ang mga nitahan pagbalik sa gobyerno.
"Kani siya i-counter check usab sa mga former rebels nato nga nag surrender, taas kaayo ang proseso ayha siya mahatagan og clearance confirming nga siya genuine NPA," matud ni Go.
Gidugang sab ni Go nga siyento prosyento nga mga NPA ang mga nitahan pagbalik sa gobyerno.
"So dili kana tinuod pwedi namo sila hatagan og chance nga ma tan-aw nato kun kinsa gyud ang nag-istorya og tinuod kung NPA ba o dili ang among surrenderees pero akong ika-ingon 100 porsyento genuine kana sila," dugang niini.
Padayon usab kining nanawagan sa mga anaa sa walhong grupo ug nagpabilin sa kabukiran nga mobalik na sa sabakan sa gobyerno gumikan kay andam ang gobyerno nga motabang kanila.