SA UNANG higayon, halapad nga lahugay ang gipatuman sa artsidyosesis sa Sugbo karong 2019 sa tanang kapin sa 320 ka mga pari sa 150 ka mga parokya sa pito ka mga distrito ug mga nangulo sa nagkadaiyang mga komisyon.
Sugod sa udto sa Agusto 6, 2019, molingkod ang mga pari sa ilang bag-ong assignment nga mga parokya. Ang installation sa bag-ong mga pastor sa mga parokya mahitabo gikan sa Agusto 13 hangtod sa 23 nga i-preside sa mga vicars general, episcopal vicars ug chancellor nga gi-delegate ni Cebu Archbishop Jose Palma.
Ang arsobispo nanghinaot nga bisan sa kalapad sa reshuffling, mapatuman kini nga hapsay uban sa pag-ampo sa tanan ug alang sa kaayohan sa simbahan.
Niadtong Biyernes, Hunyo 14, gihatag ang bag-ong assignments sa mga pari sa San Pedro Calungsod Chapel sa South Road Properties, siyudad sa Sugbo nga gisugdan sa holy hour sa ala 1 sa hapon.
Si Msgr. Raul Go, outgoing member sa team ministry sa Sto. Tomas de Villanueva Parish, Barangay Poblacion Pardo, siyudad sa Sugbo, namahayag nga pinaagi sa lahugay mas mapauswag ang pagtubo sa mga parokya sa bag-ong modumala nga team of ministry sa mga pari.
“Kay bag-o na pud, fresh na pud, presko na pud ang pamaagi, makasuway og lain na pud nga style ang mga parokyano,” sumala ni Go dihang nahinabi sa Superbalita Cebu niadtong Dominggo, Hunyo 16.
Sigon niini sa iyang nahinumduman ang lahugay karong tuiga maoy labing dako ug lapad kay ang tanang mga pari ang nalambigit ug gidungan usab og balhin.
Matod niya, sa una mga 30 to 40 percent lang sa mga pari ang maapil sa lahugay.
“Damgo ni sa mga pari magdungan gyud tanan. Sa una gud, og pananglitan ang imong part sa reshuffling kay puro gagmay nga parokya ra so, wala na kay chance nga ma-assign og dagko nga parokya. Kon puro ra dagko pud, wala pud kay chance maadto og gamay,” dugang ni Go, kinsa nagpabilin nga judicial vicar sa Metropolitan Tribunal sa artsidyosesis.
Si Msgr. Ruben Labajo, outgoing moderator sa team of pastors sa Cebu Metropolitan Cathedral, niingon 20 porsyento sa mga nangulo sa lainlaing mga komisyon ang gilahugay usab.
Sud sa kapin lima ka tuig, si Labajo nangu sa kaparian sa Cathedral ug sa Agusto 6 sa St. Francis of Assisi Parish sa lungsod sa Balamban siya mabalhin.
Siya hulipan ni Msgr. Camilo Alia, outgoing team moderator sa Archdiocesan Shrine of St. Michael the Archangel sa lungsod sa Argao.
Sa Cathedral usab mabalhin si Go, Rev. Fathers Joseph Stephen Anore, Glenn Guanzon, Ulyses Desales, Earl Sevilla ug Japheth Geonzon, ang parochial vicar.
Ang Cathedral maoy mother church sa artsidyosesis sa Sugbo.
Si Msgr. Joseph Tan, magpabilin isip media liaison officer sa artsidyosesis. Apan gitudlo siya isip rector sa San Carlos Seminary College.
Si Msgr. Agustin Ancajas, gikan sa Sto. Tomas de Villanueva Parish sa Barangay Poblacion Pardo, maoy gitudlo isip bag-ong chaplain sa San Pedro Calungsod Chapel sa South Road Properties.
Siya magpabilin usab nga chairman sa Commission on Social Communications.
Apil sa mga magpabilin sa ilang gipangulohan nga Curia offices ug komisyon mao sila si Padre Joseph Stephen Anore sa Office of Economic Affairs-Oeconomus, Msgr. Renato Beltran isip Archdiocesan Chancellor, Padre Brian Brigoli sa Cebu Archdiocesan Commisson for the Cultural Heritage of the Church ug director sa Archdiocesan Museum of Cebu, Padre Glenn Guanzon sa Commission on Worship, Padre Murphy Sarsonas sa Commission on Environmental Concern (CACEC), ug uban pa. (Superbalita Cebu)