DAKO ang kahigayonan nga ang umaabot nga administrasyon na ni outgoing congresswoman ug Governor-elect Gwen Garcia ang mohukom kon ipadayon ba o dili ang pagkuha sa Fortune Life Insurance Company Inc. (Flici) alang sa insurance program sa 27,300 ka barangay workers.
Si Jone Siegfred Sepe, pangu sa Provincial General Services Office ug vice chairman sa Bids and Awards Committee (BAC) sa kagamhanan sa lalawigan sa Sugbo, nagkanayon nga naay mga konsiderasyon nga ilang gitan-aw karon nga angay hatagan og pagtagad.
Matod niya, dunay ubang local government units nga bag-o ang administrasyon sa Hulyo 1 diin dunay posibilidad nga mag-ilis usab ang gipangtudlo nga community workers sama sa mga barangay tanod, health workers ug nutrition scholars.
Ilang tan-awon kondili ba maapektuhan ang listahan sa mga volunteer community workers sa Provincial Health Office labi na ang terms of payment kay mobayad una sa dili pa mo-cover ang insurance company.
“We have to be very certain kay naa pa pud ta sa transition phase pud. Di ba ni maka-create og problem if ato ni siya ipadayon or mas prudent ba kon sila (Garcia administration) na lang ang mo-decide kay mag-usab man gyud ang listing ana,” pasabot ni Sepe ngadto sa mga tigbalita.
Si outgoing gobernador ug Vice Governor-elect Hilario Davide III namahayag nga posible na ang administrasyon ni Garcia ang modesisyon kon unsa nga insurance company ang kuhaon.
Si Garcia daan nikwestyon sa tinguha sa kasamtangan nga administrasyon pagkuha og accident ug life insurance package alang sa 27,300 ka barangay workers.
Niadtong Abril 15, 2019, giaprobahan sa Provincial Board ang resolution nga magtugot ni Davide nga mosud og kontrata tali sa Flici.
Ang Flici maoy nihatag sa Lowest Calculated and Responsive Bid (LCRB) sa life and accident insurance sa tag P220 sa matag tawo sa 27,300 ka barangay workers o P6,006,000 sa upat ka bidders nga nisalmot.
Si Atty. Marino Martinquilla, miyembro sa transition team ni Garcia, namahayag nga ila unya kini tan-awon pag-ayo. (SCG)