GIPADAYAG ni Mayor-elect Edgardo Labella nga matukod ang P5 milyones nga Police Station (PS) 7 sa barangay Inayawan atol sa iyang administrasyon.
Ang kasamtangang barangay officials pinangulohan ni Kapitan Kirk Repollo supak nga adto tukoron sa unang yuta nga gi-donate sa kanhi barangay council pinangulohan kanhi kapitan Lotlot Ignacio sanglit makamugna kini og kahuot sa trapiko.
“I will help the police because the presence of the police station is a deterent to crime specially in that area where illegal drugs were confiscated. The proliferation of drugs in Inayawan has to stop,” padayag ni Labella.
Labing dako nga transaksyon sa shabu sa Inayawan mao ang 18 kilos nga nadakpan sa kapulisan kansang lugar nahiboan dili layo sa lugar nga tukoran sa PS 7.
Ang Police Regional Office (PRO) 7 pinangulohan ni Police Brigadier General Debold Sinas nangayo og tabang ni Labella para masugdan na ang maong PS sanglit wa sila tabangi ni outgoing Mayor Tomas Osmeña.
Ang PRO7 nikoral sa kapin 400 metros nga yuta nga maoy tukoran sa PS 7 apan sayo niining tuiga, si Repollo nangunay og pagguba sa koral uban sa iyang mga batangay tanod isip timaan sa ilang pagsupak.
Si Repollo buot nga ibalhon ang PS didto duol sa ilang sports complex nga kanhi playground diin gamay ang maong dapit itandi sa orihinal nga gi-donate sa barangay.
Ang PRO 7 dili gusto sa maong dapit sanglit para nila dili paigo ang standard nga PS ug buot nila adto sa orihinal mga pwesto.
Ang Cebu City Government maoy mo-isyu sa excavation permit, fencing permit ug building permit sa PRO 7 sa higayon nga mangayo niini.
Apan kini nga mga dokumento wala nila pangayoa sa administrasyon ni Osmeña sanglit adunay dili maayong relasyon ang duha ka mga habig tungod sa mga isyu sa patay ug miaging piniliay. (B)