SA UNANG higayon, halapad nga lahugay ang gipatuman sa artsidyosesis sa Sugbo karong 2019 sa tanang 320 ka mga pari sa 150 ka mga parokya sud sa pito ka mga distrito ug sa mga nangulo sa lainlaing komisyon.
Sugod sa udto sa Agusto 6, 2019, molingkod ang mga pari sa ilang bag-ong assignment nga mga parokya. Ang installation sa bag-ong mga pastor sa mga parokya mahitabo gikan sa Agusto 13 hangtod sa Aug. 23 nga i-preside sa vicars general, episcopal vicars ug chancellor nga gi-delegate ni Cebu Archbishop Jose Palma.
Ang arsobispo nanghinaot nga bisan sa kalapad sa lahugay, mapatuman kini nga hapsay uban sa pag-ampo sa tanan alang sa kaayohan sa simbahan ug pagsinabtanay.
Niadtong Biyernes, Hunyo 14, gihatag ang bag-ong assignments sa mga pari sa San Pedro Calungsod Chapel (SPCC) sa South Road Properties, siyudad sa Sugbo nga gisugdan sa holy hour sa ala 1 sa hapon.
Si Msgr. Raul Go, outgoing member sa team ministry sa Sto. Tomas de Villanueva Parish, Barangay Poblacion Pardo, siyudad sa Sugbo, namahayag nga pinaagi sa lahugay mas mapauswag ang pagtubo sa mga parokya sa bag-ong modumala nga team of pastors.
Sa iyang nahinumduman ang lahugay karong 2019 maoy labing dako ug lapad kay ang tanang pari ang naapil ug gidungan usab og balhin.
Matod niya, sa una mga 30 ngadto sa 40 porsyento lang sa mga pari ang maapil sa lahugay.
“Damgo ni sa mga pari magdungan gyud tanan.." dugang ni Go, kinsa nagpabilin nga judicial vicar sa Metropolitan Tribunal sa artsidyosesis.
Si Msgr. Ruben Labajo, outgoing moderator sa team of pastors sa Cebu Metropolitan Cathedral, niingon 20 porsyento sa mga nangulo sa lainlaing mga komisyon ang gilahugay usab karong 2019.
Sud sa kapin lima ka tuig, si Labajo nangu sa mga pari sa Cathedral ug sa Agusto 6 adto na siya madestino sa St. Francis of Assisi Parish sa lungsod sa Balamban.
Siya hulipan ni Msgr. Camilo Alia, outgoing team moderator sa Archdiocesan Shrine of St. Michael the Archangel sa lungsod sa Argao.
Sa Cathedral usab mabalhin si Go, Rev. Fathers Joseph Stephen Anore, Glenn Guanzon, Ulyses Desales, Earl Sevilla ug Japheth Geonzon, ang parochial vicar.
Ang Cathedral maoy ulohang simbahan sa artsidyosesis sa Sugbo.
Si Msgr. Joseph Tan, magpabilin isip media liaison officer sa artsidyosesis. Siya gitudlo isip bag-ong rector sa San Carlos Seminary College.
Si Msgr. Agustin Ancajas, gikan sa Sto. Tomas de Villanueva Parish sa Barangay Poblacion Pardo, maoy gitudlo isip bag-ong chaplain sa SPCC sa SRP. Siya magpabilin nga chairman sa Commission on Social Communications. (SCG / Dugang taho naa sa www.sunstar.com.ph)