DUHA ang patay dihadiha ug usa ang kritikal sa panagbangga sa national highway sa Barangay Bawo, lungsod sa Sogod kagahapon, Dominggo, Hunyo 16, pasado alas 4:00 sa hapon.
Usa ka motorsiklo nga dunay sakay nga tulo ka mga lalake ang nibangga ug napasok sa 6-wheeler truck nga kargahanan og bas ug graba.
Ang angkas sa motor nga managsuon mao ang dead-on-the-spot ug ang drayber maoy kritikal nga gidala sa usa ka ospital sa dakbyan sa Sugbo.
Si Police Executive Master Sergeant (PEMS) Ricardo Escubido, team leader sa kapulisan sa Sogod nga nitubag sa alarma, niila sa namatay nga managsuong Michael ug Junie Palacio, pulos na hingkod ang panuigon, ug taga Barangay Magay, lungsod sa Compostela.
Ang kritikal mao si Juvic Luna, hamtong, taga Magay, Compostela. Samtang, ang drayber sa 6-wheeler nga truck mao si Henry Molero, 50, taga Barangay Dao, lungsod sa Tuburan, kinsa nagpadulong sa norte nga bahin sa Sogod.
Sumala sa asoy ni Molero sa kapulisan, nakabantay siya sa kusog nga nagdagan nga motorsiklo nga ni-overtake sa usa ka van nga gisundan niini.
Si Molero nagkanayon nga nagpadaplin na kaayo sa dalan apan nibangga gihapon ang motorsiklo.
Matod ni PEMS Escubido, giingong nakainom ang mga sakay sa motorsiklo gikan sa usa ka salosalo sa bunyag sa bukirang dapit sa Sogod subay sa ilang nasuta sa imbestigasyon.
Atol ning pagsuwat, ang drayber sa trak nga si Molero gitanggong sa presinto sa kapulisan alang sa dugang imbestigasyon sa kaso. (B)