PINAKALISOD nga tahas sa iyang career maoy sagubangon ni Filipino fighter Eduard Folayang sa dihang iyang ikasangka ang kanhi Ultimate Fighting Championship (UFC) champion Eddie Alvarez sa ONE Championship: Dawn of Heroes.
Kini gikatakda sa Agusto 2 sa Mall of Asia Arena sa Pasay City.
Kini maoy unang away ni Folayang sukad siya matangtangi og bakos sa hapon nga si Shinya Aoki niadtong Marso.
Si Alvarez, sa iyang bahin, bag-o pa usab nasugamak og knockout nga kapildihan ni Timofey Nastyukhin sa Russia sa iyang unang away sa ONE Championship.
Si Nastyukhin mopakita usab og aksiyon sa maong card diin iyang ika-engkuwentro si Filipino Honorio Banario sa ONE lightweight World Grand Prix semifinals.
Laing Pinoy nga si Danny Kingad mosuway usab sa katakos batok ni Kairat Akhmetove sa Kazakhstan alang sa ONE flyweight World Grand Prix semifinals samtang ang kanhi flyweight champion nga si Demetrious Johnson makigkombati usab sa haponanon nga si Tatsumitsu Wada sa ONE World Grand Prix semifinals. (JBM)