MIABOT na sa Los Angeles, USA si Manny Pacquiao aron ipadayon ang iyang hugot nga pagbansaybansay alang sa iyang pagpakigbatok kang American Keith Thurman karong Hulyo 20 sa Las Vegas.
Kauban ang iyang head trainder ug suod nga higala nga si Buboy Fernandez, ang Pambansang Kamao ng Pilipinas mitaak og balik sa LA kagahapon sa buntag.
“Mas maganda kasi na mas maaga pa lang dumating dito, para ma-acclimatize,” matod ni Fernandez nga napatik sa www.abs-cbnnews.com.
Nagtuo si Fernandez nga naa na sa 80 porsiyento ang kondisyon sa bugtong 8-division world champion.
Matod ni Fernandez nga niini pa lang ka sayo, makita na niya ang determinasyon ug kadasig ni Pacquiao.
Sa sayo pa, gipabuhagay nang daan ni Pacquiao nga dili siya mokompiyansa ning awaya ug nahagit siya sa mga tagawtaw ni Thurman, kinsa mibahad nga iyang paretiruhon si Pacquiao pinaagi sa brutal nga knockout.
Hinuon aduna sab gyu’y ikabuga si Thurman ug magpamatuod niini ang iyang limpyong rekord nga 29-0, 22KOs.
Si Pacquiao, kinsa adunay 61-7-2, 39KOs nga rekord, maoy naggunit sa World Boxing Association (WBA) welterweight regular title.
Ning awaya, suwayan og ilog ni Pacquiao ang WBA welterweight “super” title nga bersyon nga gihuptan ni Thurman. (ESL)