GIKATAHO nga nagtagbo sila si Kevin Durant ug Kyrie Irving sa New York kabahin sa ilang panag-uban sa usa ka puwersa atol sa free agency sa National Basketball Association (NBA).
Gituohan nga panghitabo nagpasabot nga dili na mobalik si Durant sa Golden State Warriors sa sunod season.
Si Durant nipaubos og operasyon sa New York sa iyang angol nga ruptured Achilles ug kasamtangan kining nagpaalim.
Gituohan nga dili makapakita og aksyon si Durant sa sunod season gumikan kay nagkinahanglan og taas nga panahon ang pagpaalim sa iyang angol.
Adunay hugonhugon nga mobiya na sab si Irving sa Boston Celtics ug gituohan nga ang New York Knicks maoy sunod niyang destinasyon. Posibleng sa Knicks sila mag-uban ni Durant sa ugma damlag. (AFP, ESL)