MAG-UBAN na sila si LeBron James ug Anthony Davis sa Los Angeles Lakers alang sa sunod season sa National Basketball Association (NBA).
Ang New Orleans Pelicans miuyon nga buhian ang ilang labing pambato ngadto sa Lakers baylo nila ni point guard Lonzo Ball, forward Brandon Ingram, shooting guard Josh Hart ug tulo ka first-round draft picks.
Usa ka kasaligang tinubdan ang nibutyag niini sa The Associated Press ubos sa kondisyon nga dili siya ipaila gumikan kay dili pa mahimong opisyal ang panagbaylo hangtod dili mosugod ang bag-ong season karong Hulyo 6.
Kining maong kalambuan maoy nagtiklop sa lima ka mga buwan nga drama nga nagsugod dihang mihangyo si Davis sa Pelicans pinaagi sa iyang agent nga si Rich Paul nga i-trade siya sa laing team. Si Paul mao sab ang agent ni James.
Si Davis, 26, usa ka six-time All-Star, modala sa iyang abilidad isip usa ka eksplosibong sentro sa Los Angeles kaabag si 3-time NBA champion nga si James, kinsa sa edad nga 34 aduna gihapo’y dili mabangbang nga abilidad.
Sa panag-uban nila ni James ug Davis, malaumon ang multi-titled Lakers nga mahimo na sab silang lehitimong title contender ug makasulod pagbalik sa playoffs nga sulod na sab sa unom ka seasons nga wala nila nahimo.
Sa ilang bahin, ang Pelicans nakadawat og batan-ong mga magduduwa nga adunay dakong potensyal nga makahatag og kahayag sa ilang kampanya sa ugma damlag.
Ang labing dakong isda nga nabingwit sa Pelicans ning maong panagbaylo mao si Ingram.
Apan wala pa hinuo’y kaseguroan kon hingpit ba nga maalim si Ingram sa blood clot nga maoy hinungdan nga wala siya nakatiwas sa miaging season.
Kining maong kalambuan daw usa ka maanindot nga musika alang nila sa general manager sa Lakers nga si Rob Pelinka ug sa tag-iya niining si Jeanie Buss.
Ang front-office sa Lakers nagkaguliyang sab dihang kalit miretiro si basketball legend Magic Johnson isip president of basketball operations sa rason nga gilibak siya ni Pelinka.
Bisan wala na siya’y kalambigitan sa Lakers, si Johnson mihatag gihapon og reaksyon pinaagi sa iyang Twitter account sa pagsulod ni Davis sa Lakers.
“Great job by Owner Jeanie Buss bringing Anthony Davis to the Lakers!” tweet ni Johnson. (AP, ESL)