Nadela: Baha, landslide naghulga

ATONG kumustahon ang mga buhatan sa nagkadaiyang buhatan sa Disaster Risk Reduction and Management taliwala sa sunod sunod nga pagbunok sa ulan dinhi sa ato.

Kumusta man ang inyong mga pagpangandam batok sa posibling mga pagbaha sa inyong kasapaan?

Alang niadtong busy kaayong nangandam sa nakalabay nga El Niño wa siguro batia og kabalaka. Apan sa mga way gibuhat og nagmika sa ilang trabaho pangandam mo sa dakong problema nga taliabot. Mao ni atong kalibgan.

Karon nga nagsunod sunod na ang grabing ulan mao pay ihisgut unsay angay buhaton nga malikayan ang baha. Unta niadtong ting-init nga nagsigi ta og ampo nga mag-ulan naatiman na ang mga dapit nga sagad bahaan.

Bisan diha sa atong mga sitio ambot pila ra ka buok ang nag-atiman sa ilang mga kanal pangandam sa ting-ulan. Di sab hinuon ikaglimod nga dunay daghang nagtrabaho sa maong opisina nga way kabangkaagan sa ilang trabaho. Puro sipsip ray nakat-onan.

Naa say makamao apan kulang sa suporta gikan sa ilang mga labaw. Ang ila sab nga mga kabaw nay kapasidad unta sa paghimo og mga plano apan kanunay nga gi-unya unya ang budget. Akong nasayrab daghan ang nadistino ning maong buhatan ang nagpaabot nalang og mga adlaw kay motapos na ang ilang serbisyo sa katapusan ning bulana tungod kay lain na sab nga administrasyon.

Mao ni hagit nato sa mga bag-ong molingkod. Nga unta tutukan og maayo kining maong buhatan sanglit nia dinhi nahasandig ang daghan kaayong gimbuhaton panahon sa emerhensiya. Usa ka makuting pagsubay sa listahan sa mga responder ang angay ipatuman sa di pa manangtang.

Ang akong gipasabot nga ang mga makamao angay nga magpabilin. Kadtong way gamit adto padung sa exit. Kong lahapon gud nimo pagtangtang tungod kay pinasud sa imong kuntra sa politika di sab makiangayon labi na kong makamao sa iyang trabaho.

Disaster office man gud ni. Lisod kong imo lang yamayamaan. Busa kamong nagtinarong og makamaong motrabaho labi na search and rescue operation, kong ako lay pabut-on di gyud mo angay nga mabalaka tungod lang kay kaatbang sa politika ang nagpasud ninyo. Ang angay mabalaka mao kadtong nag-ayo lang ang tabi apan lihay kaayo sa trabaho.

Maayong laki kuno apan kong rescue mission na gani ang adtuon di na nimo makit-an kay nagsalig lagi sa iyang amo nga sikit sa namunoan.

Karon kay tingbaha na sab atong panghinaot nga di mapagan sa politika ang kaluwasan sa mga molopyo labi na niadtong naa sa mga dapit nga daan nang giila nga delikado sa baha ug landslide. Hugot nga monitoring ang gikinahanglan.

Di ta mokompiyansa. Labaw sa tanan tamdan kanunay ang gitudlo nga pamaagi panahon sa emerhensiya. Sa mga tinun-an nga molabang og mga sapa padung og gikan sa eskwelahan kinahanglan nga may magtanod kanila sa panahon nga mobundak ang kusog nga ulan.

Sa mga ginikanan sayod namo nga kamoy mohukom paeskwelahon ba o dili sila kong di maayo ang panahon. Sa mga principal ang pagpugong sa mga bata sa pagpauli kong delikado ang ilang siguridad inyo gyud nang kargo.

Maayo gani unta nga may giandam namo nga ilang katulganan kong gikinahanglan nga magpabilin sila og usa ka gabii sa eskwelahan. Nakita nako ning maong panginahanglan diha sa mga bukirang barangay. Bisan kong way sapa nga labangon ang risgo sa pagdahili sa yuta di sab malikayan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph