GIKANSELAR sa Commission on Elections (Comelec) ang mga certificates of candidacy (COCs) nila ni Konsehal Alvin Arcilla ug Sisinio “Bebs” Andales. Si Arcilla ug Andales parehong nidaog sa pagkakonsehal sa miaging eleksyon sa Cebu City north district.
Nahuman na nilang duha ang ilang ikatulo ug kataposang termino, ang limitasyon nga gisitar sa balaod. Kon makalingkod sila sa puwesto karong Hunyo 30, mag-alagad sila sa ilang ikaupat nga termino, sobra sa limitasyon sa balaod.
Si Arcilla ug Andales lakip sa 12 la mga konsehal, uban ni kanhi mayor Mike Rama ug Bise Mayor Edgardo Labella, nga gisuspensog unom ka buwan niadtong 2016 tungod sa paghatag og P20,000 nga calamity assistance sa tanang opisyal ug kawani sa syudad human sa linog ug super typhoon Yolanda niadtong 2013.
***
Ang ilang pagkasuspenso maoy ilang gigamit nga katarungan nga wa pa mahuman ang ilang mga termino kay naputol kini sud sa unom ka buwan nga pagkasuspenso. Apan wa motuo ang Comelec sa maong katarungan.
Nipasaka ang duha og motion for reconsideration ngadto sa Comelec en banc. Unang gidesidihan ang musyon ni Arcilla apan gidasonan ang nahaunang desisyon nga nagkanselar sa iyang COC.
Nadawat ni Arcilla niadtong Biyernes, Hunyo 14, ang kopya sa Comelec en banc resolution ug duna siyay lima ka calendar days sa pag-apelar niini ngadto sa Korte Suprema. Kon di siya makakuhag temporary restraining order (TRO), mahimong final and executory ang maong resolusyon.
***
Nagpaabot pa si Andales sa resolusyon sa iyang motion for reconsideration ngadto sa Comelec en banc. Apan nabalaka siya nga ang resolusyon mahimong susama sa desisyon sa kaso ni Arcilla.
Unsa ang epekto kon mahimong final and executory ang Comelec en banc resolution sa kaso ni Arcilla? Si Konsehal Jerry Guardo, nga ikasiyam sa miaging eleksyon, maoy makalingkod isip konsehal.
Di malalis ang tinguha ni Arcilla ug Andales sa pag-alagad sa katawhan sa syudad sa Sugbo.