MAAYONG Lunes, Hunyo 17. Ikatulong semana gikan sa pag-abli sa tuig tingtungha 2019-2020 niadtong Hunyo 3. Kumusta kaha ang dagan sa trapiko karong adlawa sa Barangay Mambaling, dakbayan sa Sugbo human giablihan ang underpass sa eskina N. Bacalso Ave. ug F. Llamas St. niadtong Sabado, Hunyo 15?
Sa weekend, human gyud sa pag-abli sa underpass, namatikdan nga medyo niluag ug hamugaway ang dagan sa mga sakyanan sa naasoy nga dapit hinungdan nga pipila ka drayber nga nahinabi ning mantalaan nipadayag nga nabag-ohan sa nasinati nga kalamboan.
Apan, kadaghanan kanila, nipadayag og reserbasyon bahin sa kahimtang ning adlawa tungod sa pag-abli sa laing semana sa klase ug trabaho. Masuwayan kon dako ba og matabang o pasado ang resulta sa paghimo og underpass sa dapit nga sentro kaniadto sa kahuot sa trapiko sa habagatan sa dakbayan.
Nasayod kita o bisan giangon sa mga awtoridad nga dili lapad ang underpass ug duha lang ka lanes. Kon dunay mahitabong aksidente sa underpass, seguradong momugna gihapon kini og kahuot sa trapiko.
Ug tungod sa iyang kahagip-ot, usa seguro kini sa mga rason nga walay bus o mga dagkong sakyanan nga gitugtan nga moagi sa underpass, gawas sa buses nga ang rota sa Metro Cebu lang diin hinungdan usab sa pagpiyait og ‘unfair’ sa kahungpongan sa operators sa provincial buses ug mini-buses.
Pero bantayi, ang laing nag-ung-ong nga kabalda sa trapiko sa samang dapit. Dili ba dunay plano nga isunod ang widening sa dalan sa Mambaling? Mao kini gitawag nga kaluha nga kahasol uban sa kalamboan sa dakbayan.
Sa pagkakaron, atong nuntan lang una kon pasado ba gyud ang underpass sa Mambaling. Dako kini og gasto ug taudtaod ang kahasol sa mga motorista tungod sa katukoran sa naasoy nga proyekto. Kinahanglan nga kini magmapuslanon.