GI-AGHAT sa Department of Trade and Industry (DTI) ang mga gagmay nga mga negosyante nga mas palambuon pa ang mga produkto ug negosyo tungod kay suportado kini sa kasamtangang administrasiyon.
Atol sa pagbukas sa One-Town-One-Product Philippines (Otop.ph) hub o Ginama sa siyudad sa Cagayan de Oro, mismong si Assistant Secretary Demphna Du-Naga sa DTI ang nitambong ug gi-aghat ang mga gagmay nga mga negosyante nga mas palambuon pa ang mga produkto ug negosyo tungod kay suportado kini sa administrasiyon.
"Hindi problema ho ngayon. Noon, problema ho ang capitalization, ngayon po hindi na problema kasi andito ang DTI at tsaka yung ating administrasiyon Duterte," matud ni Du-Naga.
Giingong ang administrasiyon ni Presidente Rodrigo Duterte ang andam nga motabang sa katawhan ug tumong niini nga matabangan ug molambo ang panginabuhian sa mga Pilipino.
"Bago mag alis si Duterte marami na ang milyonaryo," pahayag niini.
Naghatag usab kini og mga sekreto aron nga mamahimong malampuson diin giingong "7 ways to be successful" mao ang pag-ampo, pagsalig sa kaugalingon, pagmahal sa gihimo, pagkugi ug pasensiya, estratehiya, pakigrelasiyon sa mga kustomer ug gamay lang nga hambog ug gamay nga pamakak nga giagi sa pasiaw.