APEKTADO sa nasinatiang pagsaka sa tubig panahon nga mobundak ang ulan ang nga patigayon ilabi na sa mga nahimutang sa sentrong bahin sa siyudad sa Cagayan de Oro.
Nasayran nga nakasinati na usab sa pagtaas sa tubig ang pipila ka bahin sa siyudad human nga nibundak ang ulan.
Sa pakighinabi sa SunStar Superbalita kang Konsehal George Goking, tsirman sa komitiba sa trade and commerce, gibutyag niini nga apektado gyud ang mga negosyante sa siyudad lakip na mga estudyante nga nalukong sa baha.
"Kaayo, apektado gyud kay dili naman ganahan ang mga kustomer moadto sa mga establishments pag mag-ulan," matud ni Goking.
Giingong ipatawag niini ang mga apektadong sektor ilabi na ang mga negosyante.
"Mga 300 students ang na stranded lingkuran gyud ni nato. It is bad for investment atmosphere," dugang pa niini.
Gidugang pa ni Goking nga dili na kinahanglang magbinasolay ug aksiyonan na kini ug dili pulos lang istorya tungod kay daghan ang apektado.
Buot usab niini nga human mapatawag ang mga apektadong sektor ilabi na ang Department of Public Works and Highways, Oro chamber, University of Science and Technology of Southern Philippines ug uban pa ug magduso kini og resolusiyon kalabot na sa nasinatiang taod-taod na nga problema sa siyudad.
Kahinumduman nga gikan niadtong Hunyo 10, tulo ka mga pagbaha ang nasinati sa siyudad.