Stepfather gipusil, 6 anyos napagan

LAKIP ang 6 anyos nga batang babaye nakaangkon og samad human natapsingan og bala sa pagpamusil sa stepfather niini adlawng Sabado, Hunyo 16, sa Barangay Damilag, Camp Phillips, lungsod sa Manolo Fortich, Bukidnon.

Si Police Staff Sergeant Christian Del Carlos, investigator sa Manolo Fortich Police Station, nibutyag sa SunStar Superbalita nga basi sa ilang inisyal nga imbestigasyon, nasuta nga gipusil ang stepfather nga mao si Joelkep Rey Jamla ug nilahos ang bala ngadto sa pulso ni Alfea, 6 anyos.

Nahitabo ang insidente dihang nagpaabot sa ilang panihapon ang mga biktima.

Matud sa asawa sa biktima nga naestorya pa kadali ni Jamla ang suspek nga nagsakay og kolor pula nga motorsiklo ug nakahelmet apan pila ka minuto ang nilabay, kalit kining mihulbot og pistola ug namusil ug napagan ang bata.

Nakaangkon og samad sa iyang tiyan si Jamla ug natapsingan ang kilid nga bahin niini sa kamot nga milahos sab ngadto sa bata nga anaa naglingkos lang niadtong gabhiona.

Pulos gipangdala sa Camp Phillips Memorial Hospital apan giduso ang mga biktima sa Northern Mindanao Medical Center, siyudad sa Cagayan de Oro.

Si Jamla lamang bugtong makasulti sa motibo sa pagpamusil apan dili pa kini gaestorya karon panahona.

Nasayran nga usa ka bulan pa lamang sa dapit si Jamla human natapos ang kontrak nga trabaho sa Cebu.

Nagpaalim pa sa ilang mga samad nga naangkon ang mga biktima ug luwas na sa makuyawng kahimtang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph