GRADE 4 nga tinun-an sa Malhioa Elementary School sa lungsod sa Badian ang napalgan nalang patay sa apohan sa barong-barong sa iyang uyoan niadtong Biyernes sa hapon, Hunyo 7.
Sa dihang napalgan ang patayng lawas ni Def Leppard Siclajon, giingon nahikot ang liog niini sa habol nga gihimong duyan.
Ang amahan ni Def Leppard nga si Nerie Boy Agravante nagduda nga naay foul play ang kamatayon sa iyang anak.
Matod sa amahan nga niadtong Biyernes, Hunyo 7, sa alas 2:45 sa hapon gitawgan nalang siya nga nahikog iyang anak ug gidala na sa Badian District Hospital.
Ang doctor nga mihiling sa bata mitug-an sa amahan nga patay na kining nadangat sa tambalanan ug dili kini matod pa makatuo nga naghikog ang bata gumikan sa iyang pangidaron.
“Ni-ingon pud siya nga ang 9 anyos dili siya ka tuo nga nag hikog ni kay pwede ra siya nga maka tangtang sa duyan sa liog kay 9 yrs old na siya, diha nako nagduda,” sigon ni Agravante.
Aduna siyay gidudahan apan dili pa siya maka siguro kung kini ba gyud ang naghimo sanglit wala pa siyay ebedensya apan aduna na siyay mga lihok nga makapaduda.
Ang uyoan sa bata maoy nagpuyo sa maong barong- barong nga matod niya wala kaayoy maayong pagtagad sa iyang anak.
“Kada anha nako diha ang iyang pagtagad sa akung anak silbing pag umangkon unta na niya taphaw ra kaayog tinagdan, mangita ko sa anak dili siya mo atubang nako,” dugang ni Agravante.
Hustisya karon ang gisinggit sa amahan labot sa kamatayon sa iyang anak nga nagdamgo pa unta kini nga mahimong usa ka pulis inig ka dako na.
Nag idolo kini ni Coco Martin gani nabalian kini sa iyang bukton sa dihang miambak sa hagdan nga nag singgit nga siya si Cardo Dalisay.
Ang kapulisan sa lungsod sa Badian walay nakitang foul play sa kamatayon sa bata apan si Police Colonel Manuel Abrugena, director sa Cebu Provincial Police Office (CPPO), mimando sa hepe sa maong police station nga palawman pa ang imbestigasyon.
Matod niya nga angayan nga tan-awon pag ayo sa ilang imbestigasyon nganong namatay ang bata nga unta mahimo ra kini nga motindog aron badbaron ang hikot sa liog.
Nakig alayon na sila sa PNP Crime laboratory aron mapaubos sa autopsy ang patayng lawas sa bata.
Una nang gipangayoan og P8,000 ang kabanay sa bata alang sa autopsy apan si Abrugena misaad nga walay bayad ang pagsusi sa patayng lawas sa biktima ug andam nila kining abagan.
Midangop na usab sa Kapitolyo ang amahan sa biktima aron mangayog tabang ilabi na nga walay kwarta ang kabanay niini.