SA KABAG-UHAN karon mangatawa na ang mga tawo kon mohisgot tag orasyon o yamyamon nga makahumok sa kasingkasing. Apan si Pedrito nga usa ka abogado motuog gahom sa orasyon.
“Attorney, nganong motuo ka kang Pedot nga gamhanan tungod sa orasyon?” Pangutana niya sa higalang abogado.
“Tungod sa mga ebidensiya nga akong nakita.” Nitug-an ang abogado nga iyang silingan si Pedot nga sa gamay pa siya iya nang nasundan ang kinabuhi niini.
Ebidensiya # 1:
Dose anyos pa ko amigo na mi ni Pedot. May silingan ming guwapa kaayo nga si Elena. Si Pedot naibog. Nangatawa ang mga ulitawong silingan nga naninguha sad sa dalaga. “Ikaw, Pedot, sugton? Pobre ug way grado, ngil-ad pag nawong?” Tamay ni Joselito, ang ambungang ulitawo sa among dapit. Wa motingog si Pedot, mihangad sa langit nga nagkibot-kibot ang baba dayong lantaw sa bentana diin didto nanambo si Elena. Paglabay sa mga adlaw gitaban ni Pedot si Elena ug nipauli nga mabdos na.
Ebidensiya # 2:
Pista to sa barangay. Nagkagubot ang baylehan. May naghuramentado nga ulitawo kay way nipares sa matag huni nga tugtugon kay hubog. Nanumbag, apan gikulata sa mga tanod. Midagan palayo sa baylehan. Pagbalik nanigbas nga way giliatan. Mga batag tiguwang nga matagbuan. Mialibwag ang mga tawo. Nanagan ang mga tanod uban ang pulis nga batan-on nga mao pay pag-abot sa baylehan. Nagkurog ko nga nagpasalipod sa punoan sa lubi. Miabot si Pedot. Nagharong sila. Nakita ko nga nagkibot-kibot si Pidot. Takulahaw, nalun-os ang naghuramentado, mitahan sa iyang pinuti nga nagkadugo kang Pedot. Nangabot dayon ang mga tanod unya gipusasan sa pulis ang naghuramentado.
Ebidensiya # 3:
Kausa nakita ko si Pedot nga nagdali. Akong gisundan. Didto padung sa dakong puting balay sa malditang Merdeka nga nakabanag Merkano. Isog nga babaye. Di kaduolan. Way suluguon nga magdugay kay kanunayng puno sa kasaba ug mabun-og pa. Nganong giyano-yano lag sulod ni Pedot ang dakong balay? Hasta dagkong mga iro sa pultahan mokitiwkitiw kang Pedot. Nahibung ko. Mosud ta ko apan mikaranguot ang usa ka iro nga mitan-aw nako. Nakasud na si Pedot. Mikatkat ko sa labong nga kaymito atbang sa bentana. Wa ko magdahom! Nakita kong gigakos si Pedot ni Merdeka. Gihuboan si Pedot ni Merdeka. May ‘abs’ man pod diay si Pedot. Hinayhinayng naghubo ang babaye nga puti kaayo ang lawas. Apan kalit nakasud ang banang Merkano, nagtiog riple kang Pedot. “I’ll kill you, monkey!” Mamatay na ang akong higala! Apan nakita kong nagkibot-kibot si Pidot. Inanayng nalun-os ang Merkano. Sa kaigmat nakuha niya ang iyang brief ug karsones ug midagan. Libre si Pedot.
Wa na ko makaagwanta gipangutana ko si Pedot ngano siyang magkibot-kibot. “Orasyon ni, Pedring. gikan pa sa akong katiguwangan. Kon gusto ka tagaan tika, apan inig-edad na nimog 18.”
Dugay na nga wa na sila magkita ni Attorney. Iya na lang nabalitaan nga daghang dagkong mga kaso nga nadaog niini sa korte. Gahom sa orasyon? Tiguwang na kaayo si Pedot. Dihang namatay kini nakita niya ang abogado nga pulos itom ang polo shirt ug karsones. Mailhang nagbangutan. (KATAPUSAN)