DEAR Noy Kulas,
Maayong adlaw. Tawga ko sa ngalan nga Ms. Jey. Bisan 20 years old pa ko, duna na koy live-in nga 35 years old.
Moangkon ko maldita ko nga pagkababaye ug babaon. Pirme ming mag-away, labina karon nga mabdos na ko. Pirme ini ang akong ulo. Gamay ra nga bikil ako dayon padak-on. Karon klaro na ang akong tiyan kay hapit na ko manganak.
Bag-ohay lang nausab siya og kalit kay di na ko niya tubayan kon masuko na ko kay nadoble ang akong kamaldita karon nga mabdos ko. Nikalit lang ko og kapinangga niya. Kaniadto, tag alas 4 na siya sa kaadlawon maabot kay gikan nag-inom ug laag sa mga barkada. Karon, tagsayo na mouli gikan sa trabaho. Wa na ko makasakop nga duna siyay text o chatmate. Lahi ra kaayo siya.
Ang bati karon, Noy, kay nawagtang na akong love niya. Di na ko ganahan niya sukad namabdos ko. Nag-ask gani ko sa akong self nganong nakig-relationship ko ani niya nga maguwang kaayo nako. Unsa kahay akong buhaton kay bisan ang iyang pamilya gusto kaayo nako. Inatiman kaayo ko nila. Molayas na lang ba kaha ko sa among gipuy-an? Unsay imong huna-huna, Noy?
MS. JEY
Ms. Jey,
Ayaw una pag-decide og bisan unsa samtang mabdos ka pa ug kon bag-o ka pang nanganak kay ang imong kahimtang karon dunay epekto sa imong panghuna-huna tungod sa mga kausaban sa imong lawas tungod sa imong pagmabdos. Ikaw ra gani ang niingon nga grabe na ang imong kamaldita, nidoble sukad ka nimabdos. Busa, ayaw una pag-ingon nga kalit lang nawagtang imong feeling para niya kay basin tungod sa imong pagmabdos na.
Posibleng dunay nakatambag niya nga di ka tubayan ug tarungon ka pagtratar mao nga ingon na siya motagad nimo. Magpasalamat ka nga nausab na siya ug panghinaut nga magpadayon na ang iyang pag-usab kay umaabot na siyang amahan. Kon unsa man siya karon, imo usab ipakita kaniya nga nakauyon ka sa iyang pag-usab inay imong tubayan ang imong pagkamaldita. Makakita ra siya sa positive response nimo kaniya. Di kay imo siyang malditahan bisan wa kinahanglana o wa sa sitwasyon. Ayaw sab palabi kay basin duna ni negative impact sa imong gisabak. Pag-ampo kanunay aron makuhaan ang imong kasuko ug kalagot sa imong sitwasyon karon.
NOY KULAS
Alang sa imong problema, e-mail sa kulassuper@sunstar.com.ph ug rojval69@yahoo.com