GIBANGGAAN. Daghan ang dili motuo nga wa bangga-i ang fishing boat, F/B GIMVER1, nga ginama sa kahoy, sa atong kaigsoonan nga mangigisda nga nagpundo lang didto sa Recto Bank ug nalunod niadtong gabii sa Hunyo 9. Gani, abandonar lang ang 22 ka tripulante sa nakabangga nga fishing vessel nga iya sa taga Tsina.
Pung pa ni AFP West Command spokesman Lt. Col. Stephen Penetrante nga human kini mabangga-i nibiya lang nga mora og “hit and run” kon diri pa na sa yuta nahitabo. Maayo gani kay ang 22 ka tripulante nga lutaw-lutaw sa dagat giluwas sa Vietnamese fishermen.
Ang morag kataw-anan pa nga balita kay ang Vietnamese nga maoy una nga mitabang sa atong kaigsoonan nga mangingisda mao pay gidudahan nga maoy nakabangga. Ang atong kagamhanan igo ra nga nanghimaraot sa nahitabo apan way mahimo tungod kay higala sa administrasyon Duterte ang Tsina.
Kon ang mga eksperto ang pasultion dili aksidente ang nahitabo kon di usa to ka tinuyo nga paglunod sa Filipino fishing boat. Gituhoan nga usa to militar sa Tsina nga fishing vessel kay kon mga sibilyan nga intsik ug aksidente ang bangga di to pasagdan ang 22 ka Filipino nga mangigisda.
Hangtud kanus-a man ang sige nga pangharas sa atong mga kaigsoonan nga mangingisda sa lawod nga bisan og sakop pa kini sa atong hurisdiksyon? Ang makatubag ani ang atong ra gyud nga kagamhanan.
Gani, kon gitahud pa ta sa Tsina nga higala ubos sa administrasyon ni Presidente Duterte dili unta ni buhaton sa intsik-militar ang pagpangilkil sa atong mangingisda ug ang kining bag-o nga panghitabo.
•••
PROBLEMA. Sa Hunyo 30, 2019 mosugod na og lingkod si Mayor-elect Edgardo C. Labella ngan nga bag-o nga mayor sa dakbayan sa Sugbo human nga iyang gipukan si Mayor Tomas Osmeña niadtong Mayo 13 nga piliay. Apan ning sayo pa, nakita na ni Mayor Labella ang dakong bul-og sa problema sa dakbayan nga iyang sagubangon unya.
Mao ni ang usa sa mga gihisgotan ni Atty. Frank Malilong sa programa nga “FRANKAHAY TA” sa DyCM (1152AM) kagahapon. Si Mayor Labella ug Torni Frank suod nga higala ug kauban sa ilang pundok nga “walk and talk”. Usa sa mga problema mao ang basura kay, matud pa ni Torni Frank, motapos ang kontrata sa Jomara, ang tighakot sa basura, igsugod ni Labella og lingkod.
Lain nga problema, mahoman na usab ang kontrata sa dakbayan nga adto molabay sa ilang basura sa lungsod sa Aloguinsan dumpsite nga gipanag-iya ni kanhi Aloguinsan Mayor Chauncey Moreno. Kining mga problema nga atubangon unya ni Mayor Labella dunay mga kasulbaran.