MORA man og nagpabaga sa iyang nawong si outgoing Governor Hilario Davide III.
Mokanaog na siya sa puwesto karong katapusan sa buwan apan mihirit pa nga mopagawas og dakong kantidad isip pasiunang bayad sa pagtukod anang iyang gidamgo nga Human Resource Center o ‘Torre de Davide’.
Mihangyo siya ni Provincial Accountant Marieto Ypil nga mopagawas og P194 million isip pasiunang bayad ngadto sa WT Construction nga maoy nakadaug sa bidding. Ang kantidad nagrepresentar og 15 per cent sa P1.3 billion nga kantidad sa maong 20 ka andana nga edipisyo.
Ang administrasyon ni Davide mi-apply og loan sa Development Bank of the Philippines (DBP) og P1.5 aron itukod sa maong building. Aduna nay memorandum of agreement nga gilagdaan apan wala pa mapagawas ang kuwarta.
Mihulga pa si Davide ni Ypil og insubordination kay wala mosanong sa iyang hangyo. Si Provincial Treasurer Roy Salubre misalindot usab sa hangyo ni Davide gumikan kay walay pundo para niana.
Si governor-elect Gwen Garcia mipadala og suwat ngadto ni Davide nga nagdili sa paghimo og mga midnight appointments ug mo-release og pundo. Dakong supak si Gwen sa maong proyekto kay alang kaniya dili kini maoy priority sa iyang administrasyon ug nag-usik-usik lang kini sa kuwarta.
Apan namugos gyud si Davide nga ipagawas ang maong dakong kantidad. Ngano kaha?
Unsa man, naka-advance na siya sa iyang “commission o SOP” gikan sa kontraktor? O nakagamit na si Davide sa pundo gikan sa kontraktor niadtong panahon sa eleksiyon?
Dili maki-angayon alang kang Davide ang maong mga akusasyon. Apan dili usab nato mabasol ang publiko nga magduda. Dili na lang unta ipamugos aron dili magdudahan. Nagkamuritsing na ang administrasyon ni Davide sa mga anomaliya. Unya mobiya siya sa iyang puwesto karon nga magdala gihapon og lapok gumikan sa iyang katapusang hirit sa dakong kantidad. Pagbaton tawon og delicadeza, Mr. Governor. (bobbygnalzaro@gmail.com)