BISAN og supak si Inayawan Barangay Captain Kirk Bryan Repollo, porsigido nga ipadayon sa Cebu City Police Office (CPPO) ang pagtukod og police station sa maong barangay.
Kini ilabi na nga si mayor-elect Edgar Labella mipadayag sa iyang pagsuporta kalabot niini.
Niadtong Marso, nagkasungi si Repollo ug ang kapulisan sa dihang gipaguba sa kapitan ang koral sa 500 kuwadrado nga luna nga maoy tukoran unta sa police station.
Dunay mga dokumento nga gihikyad si Repollo nga maoy iyang gibasehan kon nganong dili angay butangan og police station ang maong lugar. Gitanyag sa kapitan nga adto na lang unta kini tukoron sa dapit nga kanhi duwaanan sa mga bata.
Apan wa mosugot ang mga kapulisan niini tungod sa kagamay ra usab sa puwseto kon itandi sa dapit nga gidonar na sa barangay ngadto kanila sa niaging pamunoan sa barangay.
Ubos sa pagpaluyo ni Mayor Tomas Osmeña, nilampos si Repollo sa pagpahunong sa konstruksiyon sa police station kay wala man lagi hatagi og permiso sa City Hall.
Apan sugod sa Hunyo 30, malahi na ang dagan sa senaryo. Wala nay igong gahom si Osmeña nga makadepensa sa bagitong kapitan. Sa iyang pagpademolis sa koral, si Repollo mitumbok nga isip Kapitan aduna usab siyay police power sa pagguba sa mga illegal structure.
Karon, mo-insister pa ba kaha gihapon siya sa iyang baruganan? O andam na ba kaha siya nga mohatag og barangay clearance alang sa maong edipisyo ug makig-abin na sa mga kapulisan.
Interesting ning sitwasyona, kay daw og sa nitapon man ang panagbangi sa kapulisan ug ni Osmeña ngadto na ni Repollo.
Kon unsaon pagdumala ni Repollo ang Inayawan nga way maayong relasyon sa kapulisan, kini maoy dakong hagit sa iyang pamunoan.