ORMOC City, Leyte - Malampuson ang pagpahigayon sa 'Ormoc City Parade of Lights 2019' niadtong Sabado sa gabii, Hunyo 15.
Matod ni Police Major Rex Cantillep sa Ormoc City Police Office (OCPO), naa sa kapin kun kulang 10,000 ka tawo ang nisaksi sa aktibidad.
Gikan sa usa ka dakong Mall sa Barangay San Pablo nagsugod ang parada paingon sa Ormoc City Stage.
Ang Parade of Lights gisalmotan sa 11 ka partisipantes sa nagkadaiyang sektor.
Tema sa parada ang storyland diin patok sa mga bata sama sa Disney and Pixars, Aladdin, Lion King, Tangled, Cinderella, Alice in Wonderland, Captain Hook, Hansel and Gretel, Snow White, Peter Pan, Winnie the Pooh ug Johnny Tractor.
Nagpatigiay sa tagsatagsa ka float ang mga niapil diin gamit ang mga neon lights ug nagsul-ob usab og costumes ang mga nisakay base sa karakter.
Atol sa parada, gipawong ang street lights sa mga karsada nga maagian aron makita sa katawhan hilabi sa mga bata ang kaanindot sa mga float.
Alas 9 sa gabii niabot sa City Plaza ang parada ug gideklarar ang mga ningdaug.
Sa Socio Civic and Schools Category, 1st place ang Peter Pan sa Kiwanis Club of GEO Ormoc; 2nd ang Aladdin sa Western Leyte College ug 3rd ang Tangled sa Ormoc Chamber of Commerce and Industry (OCCI).
Sa Corporate/Business and Government Category, 1st place ang Alice in Wonderland sa OSPA Farmers Medical Center; 2nd ang Cinderella sa Lorenzo Baltonado Group of Companies ug 3rd ang Lion King sa MLhuillier Financial Services.
Si Ormoc City Mayor Richard Gomez niingon nga sunod tuig, gusto nila nga apil na ang ubang munisipalidad sa Parade of Lights.
“Next year we will have a bigger one. I would like to invite the other municipalities. Siguro, initially the fourth district (municipalities). Let see if they want to join kasi it’s nice, it’s beautiful people are having fun, they are enjoying Ormoc City’s Fiesta season,” matod Mayor Richard Gomez.
Di usab makatuo si Vice Mayor Toto Locsin sa paghangop sa katawhan sa maong aktibidad.
“Grabe. Shock kaayo mi no. Kay sa pagsugod wala mi kahibawo nga ingon ani kadaghan ang tawo nga mag huwat sa karsada para mo tan-aw sa parade of lights. Mao man gyod ni atong goal nga maghatag og kalingawan sa mga Ormocanon, so nalipay lang gyod mi nga daghan ni-participate, daghan nitan-aw and ang mga participants maayo kaayo ang pag organize,” matod ni Ormoc City Vice Mayor Toto Locsin Jr.
Samtang, si Ormoc Fiesta Executive Committee Chairman Jude Abenoja, nihulagway nga mas grabe kadaghan sa mga tawo karong tuiga.
“It’s very successful, well attended and well participated. In fact, ang akong count ha, in term of population, ni times five ang population compared last year,” matod ni Abenoja.
Human sa pagdeklarar sa mga ningdaog, gisunod dayun ang tulo ka minuto nga fireworks display sa plaza.
Natapos ang aktibidad alas 9:30 sa gabii.