NAGBANSIWAG sa mga mantalan ug maoy nahimong headline sa mga radio, television ug bisan sa mga social media ang pagtapon ni Anthony Davis sa Los Angeles Lakers sa niaging adlaw.
Kini human nagkasinabot na gyud ang Lakers ug ang New Orleans Pelicans sa taodtaod nang gihugonhugonan nga binayloay og players nga gani usa ka higayon nahimong controversial issue.
Tungod sa ilang dakong interest ni Davis, ang Lakers napugos sa pag-release sa ilang tulo ka mga batan-on apan promising nga mga players nga sila si Lonzo Ball, Brandon Ingram, Josh Hart ug tulo ka draft picks.
Dili kuwestiyon kon kinsa ang nakabintaha og dako sa maong panagbayloay og players tungod kay masabot nga aduna may katagbawan ang matag habig.
Gusto man sa Pelicans nga magpabilin sa ilang kampo si Davis, apan mas ilang gipalabi ang hangyo sa 6-7 nga all-around player nga mobiya kanila ug moduwa sa laing team.
Ang Lakers, sa ilang bahin, human sa makapasagmuyo nga unang tuig ni LeBron James sa team, nakadesider nga mopalig-on og samot sa ilang puwersa ug ang 26-anyos nga Davis maoy usa sa ilang target nga karon nahatagan og katumanan.
Wa man tuoy kasiguroan kon ang panagparis ni James ug Davis makagarantiya ba og championship sa Lakers, apan usa lang ang napanglantawan nga makahatag og hugot nga kombati sa sunod nga mga season.
Sa sitwasyon karon sa Golden State Warriors nga daw og mabiyaan sa ilang pipila ka mga sinaligan, ang Western Conference mahulagway nga wala nay dominadong team ug dako ang tsansa sa Lakers.
Human makuha si Davis, gipanglantawan na usab karon sa Lakers si Kemba Walker sa Charlotte Hornets kinsa mamahimo na usab unyang free agent karong Hulyo.
Duna pay igong ikatanyag ang Lakers ni Walker bisan mangayo pa kini og maximum nga kontrata aron mahitsas na ang ilang Big 3.
Mipadayag si Walker nga prayoridad niya nga magpabilin nga Charlotte apan magdepende ra usab kini sa tanyag. Kon dili moapas sa presyo ang Charlotte, dako ang kahigayonan nga mahinayon ang Big 3 sa Lakers.
Sa dihang mibalhin si James sa Miami Heat gikan sa Cleveland Cavaliers, ang iyang pagpakighugpog nila ni Chris Bosh ug Dwyane Wade mibunga og duha kampiyonato sulod sa upat ka finals.
Sa pagbalik niya sa Cavaliers, iyang gikatambayayong sila si Kevin Love ug Kyrie Irving diin nakalangkat usab sila og kampiyonato sulod sa tulo ka tuig.
Ang Pelicans, sa ilang bahin, mahulagway nga magsugod sa uno. Buot ipasabot nga sa umaabot nga season langkuban na unya sila sa mga batan-ong players apan mga dekalidad.
Sa drafting karong Biyernes, target sa Pelicans ang top draftee nga si Zion Williamson, Bisan tuod og sangkap sa talent apan sa iyang pagka-rookie dili pa gyud mahimong hatagan og dakong responsabilidad.
Daghan pang mga picks nga magamit ang Pelicans atol sa drafting, lakip na ang tulo nga gikan sa Lakers.
Kini maoy nakahatag kanila og dakong pabor nga makapili ug makapanghashas sa mga rookie draftees. Pero sa gikaingon ko na sa unahan, nga lisod hatagan ug dakong responsabilidad ang mga bag-ong players.
Sa laktod nga pagkasulti, modagan pa og upat ngadto sa lima ka season gikan karon nga mahimong title-contender ang New Orleans kon magpabilin nga intact ang ilang mga rookie players sugod sunod season. (jun.migallen22@gmail.com)