MOLARGA karong Agusto 4 paingon sa Spain ang Gilas Pilipinas aron mosagubang og sunodsunod nga tune-up games isip tipik sa ilang pagpangandam alang sa FIBA World Cup nga ipahigayon sa China.
Nagkanayon si national team coach Yeng Guiao nga ning maong biyahe, makigharong sila og teams gikan sa ubang nasod nga apil sab sa FIBA World Cup.
Wala gibutyag ni Guiao kon unsa nga teams ang ilang ikasangka apan labing seguro, usa niini ang Spain national team.
“I think that’s a good tune-up for us. Yung Spain I think they have seven or eight NBA players and all of them would be there,” matod ni Guiao sa interbyu sa Spain.ph.
Ang Spain, nga maoy Fiba World Cup champion niadtong 2006 ug kasamtangang world no. 2, gilangkuban sa mga magduduwa sa NBA nga sila si Marc Gasol, Ricky Rubio, Serge Ibaka, Pau Gasol, Rudy Fernandez, Nikola Mirotic ug uban pa.
Matod ni Guiao nga ang pagpakigbatok sa Spain makatabang og dako aron mahashasan pa ang kapabilidad sa Gilas Pilipinas.
Inig balik sa Gilas Pilipinas, padayon kining magbansaybansay sulod sa duha ka mga semana sa dili pa sila mogikan paingon sa China alang sa FIBA World Cup nga sugdan karong Agusto 31. (ESL)