SUBHAN ugma, Hunyo 19, ang ecological park nga mopakita sa biodiversity conservation ug pagpakunhod sa kausaban sa klima diha sa bukirang bahin sa Magsico, San Fernando, Cebu.
Si Cebu Archbishop José S. Palma maoy mangunay sa pagsubo sa SEDC San Augustin de Hippo Ecotourism Park.
Gialambo kini sa Solid Earth Development Corp. (SEDC) developed uban sa Archdiocese, diin 2,500 ka bag-ong kahoy ang gitamon dugang sa 6,600 nga gipangtanom.
Ang maong proyekto inabagan usab sa munisipyo sa pagpalambo sa San Fernando Ecotourism Park.
Gilagdaan ang kasabutan nila ni Mayor Lakambini G. Reluya ug Dennis B. Tenefrancia, pangulo sa SEDC, ning bag-o pa lang uban sa pagpananom sa lunang dos mil metro kwadrado sa Barangay Magsico dinuyog sa pagbuhos sa ulan.
Lakip kini sa 2.6 ka ektaryang luna nga kanhi giminahan sa SEDC og mga minerales alang sa paghimog og semento sa Taiheiyo Cement Philippines, Inc., samang luna nga may bahing gidonar pagka-Pebrero 2016 alang sa usa na ka Rural Health Unit.
Mihangyo si Mayor Reluya sa SEDC pagka-2017 alang sa luna nga ugmaran sa gihandom niyang eco-park. Gitanyag kini sa kompanya pinaagi sa usufruct, kasabutan nga gitugtan sa SEDC ang kagamhanang lokal nga mogamit sa luna alang sa usa ka eco-park.
Misentro ang mga mensahe nila sa mayor ug ni Tenefrancia sa panginahanglan nga moduyog ra ang pamatigayon sa kinaiyahan. “Kinahanglan nga balanse ang kaugmaran ug ang pagpatunhay sa kinaiyahan,” siya miingon.
Gipasabot ni Reluya nga katuyuan sa eco-park ang “pagtanyag sa makinaiyahang kasitani-an sa tanan,” uban sa pagdugang nga makasulod ang publiko aron “masinati nila ang kahimtang nga adunay balanse tali sa kinaiyahan ug kaugmaran.”
Sangtuwaryo
Sa disenyo nga giduso sa municipal engineer nga si Simeon A. Lauronal nga nauyunan sa mayor, ang San Fernando Ecotourism Park aduna unya’y sangtuwaryo sa mga alibangbang duol sa entrada, kalasangang kawayan, tanamang herbal ug hardin sa mga bougainvillea.
Sa kasingkasing niini ang usa ka grotto sa Birheng Santa Maria nga gilibotan og fish pond nga may taytayang motabok, nagdugtong sa mga agi-anan sulod sa eco-park nga aduna sa’y dulaanan, kanyawang kakahuyan ug toldahan, ug dapit sa mga kalihokan.
Laing centerpiece ang Bahay Kubo nga mo-aninag sa kulturang Pilipino ug lig-ong kinaiya, ug ingon man sa kayano ug paglahutay. Mobarug kini uban sa sentro sa kalihukan nga may kan-nan, dormitoryo nga mga 10 ka lawak, ug panghandumanan.
May igong paradahan ang eco-park alang sa mga salakyanan ug motorsiklo sa may pultahan kung asa sab mahimutang ang opisina, nga may mga kawani nga andam moabag o’ mogiya sulod sa eco-park nga duol og sapa.
Misaksi si Taro Sumi, technical adviser sa SEDC, sa pinirmahay sa usufruct agreement uban nilang Konsehal Eutiquio Baricuatro, nga kanhi sab kapitan sa Magsico, PJ Medalla ug Erico Enad.
Lakip sab sa mga misaksi sila si San Fernando ABC president Ricardo Reluya ug ubang mga opisyales sa lungsod nga sila si Dr. Rowell Panuncial sa LDRRMO, ang agrikulturista nga si Nelson Soronio ug acting treasurer Edsel Laguna, uban ni Magdalena Panuncial nga usa ka purok lider.
Gilauman ni Mitzie Almira I. Carin, tagduma sa SEDC sa human resources and administration division niini, nga mabuksan na hapit ang San Fernando Ecotourism Park kung magamit na ang nagahin sa munisipyo alang sa maong proyekto. (PR)