SI Bokal Sun Shimura maoy labing daghan nga na-author nga committee reports ug resolusyon sa tanang outgoing board members sa 14th Sangguniang Panlalawigan (SP) sa Sugbo, gikan sa tuig 2016 hangtud sa 2019.
Hinuon, kung basehan ang gidugayon sa serbisyo diha sa Provincial Board, si Bise Gob. Agnes Magpale maoy dunay labing daghan og resolusyon ug committee reports.
Giandam na sa Provincial Board secretariat ang mga pasidungog alang sa mga outgoing nga sakop sa 14th SP, nga naglakip sa presiding officer nga si Bise Gob. Agnes Magpale, Bokal Alex Binghay, Sun Shimura, Jude Sybico, Glenn Bercede ug ex-officio member Earl Oyas sa Phil. Councilors League Cebu Chapter.
Gitug-an ni PB Secretary Pulchra Acevedo nga si Shimura naka-author ug kapin sa 200 ka committee reports ug laing 200 usab ka mga resolusyon. Tulo usab ang napalabang niini nga ordinansa.
Si Shimura, nga napiling mayor sa Daanbantayan sa miaging eleksiyon, maoy chairman sa Committee on Peace and Order, Public Safety ug Accreditation sa PB.
Ang awarding ceremony himuon atol sa uwahing sesyon sa PB karong Hunyo 24, diin patambungon sab niini ang incoming board members.
“Wala ra sad na in the past, wala ra ang governor. So exclusively sa current set ug sa incoming (board members, nga gi-invite,” niingon si Acevedo.
Nagsunod kang Shimura si Oyas, nga naka-author ug kapin sa 400 ka mga resolusyon. Hinuon sagad niini mga commendation alang sa mga malampuson nga mga anti-drug operation sa kapulisan.
Si Oyas nikaog na isip PCL president human nidaug sa pagka-bise mayor sa Catmon.
Ikatulo mao si Bise Gob. Magpale, nga nakahimo ug kapin sa 100 ka mga report, dul-an sa 200 ka mga resolusyon ug 8 ka mga ordinansa gikan sa 2016 hangtud 2019.
Matod ni Acevedo, first honor si Magpale kung basehan ang kasinatian. (AZLG)