WAY epekto sa pagpadayon sa pasiunang trabaho sa dapit diin tukoron ang Provincial Resource Center ang pagdumili ni Provincial Treasurer Roy Salubre pagpagawas sa pundo alang sa advance payment o mobilization fee sa kontraktor niini.
Sa nasayran, moabot sa kapin P194 million ang gi-request ni Provincial Engineer Hector Jamora nga mabayad ngadto sa WT Construction, nga tugbang usab sa 15% sa actual contract price apan gi-disapprove ni Salubre ang disbursement voucher alang sa maong katuyuan.
Matod ni Jamora, dunay kontrata ang WT Construction alang sa proyekto busa dili niini mahimong undangan ang trabaho.
Sa pagka-karon, gipadayag ni Jamora nga nagpadayon ang excavation ug sheet filing sa construction site bisan paman ug wala pa bayri ang kontraktor sa advance payment.
“Padayon gyud siya kay under contract man na niya. Siya man gyuy contracting party gyud,” niingon si Jamora.
Ang mobilization fee gitumbok ni Jamora nga dako ug tabang aron dunay pondo nga makuot ang kontraktor sa pag-implementar niini sa proyekto.
Apan kung dili siya hatagan niini, wala magpasabot nga undangan sab niya ang trabaho.
Kompiyansa hinuon si Jamora sa dako nga financial capability sa WT Construction.
Sama ni Salubre, si jamora nakadawat usab kopya sa suwat gikan sa transition team ni Governor-elect Gwendolyn Garcia nga nagpasidaan sa mga department head nga dili mo-process sa billing o bisan unsang dokumento may labot sa maong proyekto. (AZLG)