P3.3B pundo lakip sa ibilin: Fortuna

MGA department head sa Mandaue City hall gipakigtagbuan ni outgoing vice mayor ug acting mayor Carlo Fortuna kagahapon sa buntag, Hunyo 17.

Kini human nga duha ka semana na lang himuon na unya ang pag-turnover sa mga importante nga dokumento sa syudad ug sa katungdanan gikan sa outgoing officials ngadto sa incoming Mandaue City officials.

Samtang, mapasigarbuhon si Fortuna nga datu ang syudad nga ilang i-turnover ngadto sa bag-ong’ pamunuan tungod sa kasamtangang P3.3 bilyoness nga kwarta diha sa panudlanan sa dakbayan.

Matod ni Fortuna, gikan lang kini sa ilang koleksyon sukad Enero ning tuiga hangtud karon Hunyo.

Gipasiguro niya nga andam na ang mga gikinahanglang dokumento sa matag departamento, lakip na usab gipapadayag niya ang matag kabalaka o yangungo sa department heads.

Kini aron maoy irekomendar ngadto sa mosunod nga administrasyon nga angay nga tan-awon ug aksyunan dayon.

Kini sama nalang sa paglabay sa basura human nga usa sa labayanan sa kadaghanan sa basura sa siyudad sa Mandaue, mao ang sa ARN builders nga anaa sa barangay Binaliw sa dakbayan sa Sugbo nga gipasusi karon nga gikahadlukan nga masuspenso o mapasira gyud, tungod sa mga reklamo sa residente.

Lain pa ang kalabot sa pampubliko nga merkado diha na duol sa City hall, nga giingong gilangay pag-ayo sa paghuman sa kontraktor ug nga gamay lang ang capacity ikompara sa mga gidaghanon sa daan na nga manindahay sa merkado diha likud sa Mandaue City Sports Complex.

Buot usab nga matrabaho dayon ang proteksyon pinaagi sa Temporary Environmental Protection Order (TEPO) alang sa mga bakhawan, diha sa may barangay Paknaan, nga iya sa gobyerno, nga giangkon sa usa ka pribadong indibidwal ug gipaabunuhan alang sa gihimo nga pribadong’ housing project.

Lain pa ang kalabot sa dos mil ka mga job order employees nga gikahadlukan nga dili ma-renew human mapupos ang ilang kontrata karong Hunyo 30, human kasagaran sa ilang mga trabaho naglambigit og technical ug napaubos gyud sila sa training alang niini.

Si Fortuna ang nilingkud isip acting mayor sugod niadtong Hunyo 5, human nga naka-on leave si outgoing mayor Luigi Quisumbing ug giingon nga anaa sa gawas sa nasud, alang sa tulo ka semana nga bakasyon.

Hinuon gitataw ni Fortuna nga motambong si Quisumbing sa himuon nga yano nga turn-over ceremony gikan sa administrasyon ni Quisumbing ug Fortuna, ngadto sa bag-ong mamahala sa Mandaue City government, sila mayor ug vice mayor-elect Jonas Cortes ug Glenn Bercede.

Himuon, kini karong Hunyo 28 sa alas 8:30 sa buntag diha sa session hall, base sa circular order nga gipagawas sa Dept. of Interior and Local Government (DILG).

Giklaro ni Fortuna nga andam na ang mga dokumento, ug andam kini nga review-hon sa transition team sa kampo ni Cortes karong semanaha.

Atol sa tigom, nitambong ang vice liason sa kampo ni Cortes nga si Atty. Giovanni Tianero. (FMD)