1,900 mawad-ag trabaho sa Lapu-Lapu

SA DILI pa hingpit mobiya si outgoing Lapu-Lapu City Mayor Paz Radaza iyang gipabawnan ang mga kapin sa 1,900 ka mga job order (JO) og cash incentives, samtang ang mga regular, casual ug co-terminos nga kawani sa city hall ang una nang nakadawat sa ilang bunos.

Sa unang adlaw sa Hulyo mohulip na ang bag-ong administrasyon sa kagamahan sa Lapu-Lapu ubos sa pamunoan ni incoming mayor Junard Chan, samtang si Radaza molingkod isip kongresista sa lone congressional distict sa maong dakbayan.

Atol sa katapusang pakigpulong ni Radaza sa tanang kawani sa city hall kagahapon, Hunyo 17, nga kabahin sa kasaulogan sa ika-58th Charter Day, siya nisaad nga dili maguol ang 1,943 ka mga JO.

Human nga ang mga regular, casual ug co-terminos employees ang una nang nakakubra sa ilang mid-year bunos niadtong hinapos nga bahin sa Mayo.

Samtang ihatag sud ning semanahona ang Conditional Compensation Premium (CCP) alang sa JOs.

Human sa maong pahibawo milanog ang pagpamakpak sa mga JO nga mitunga sa maong kalihokan bisan nga way trabaho tungod kay holiday ang dakbayan sa maong adlaw.

Nasayran nga ang CCP magbase sa mga adlaw nga ang JO mitrabaho sukad niadtong Enero 1, 2019 ngadto na sa Mayo 31, ning tuiga nga gibana-bana nga mokabat sa P9,000 – P10,000.

“Ang ilang (JO) pay morag one-month sab (ang kuwentada),” pasabot ni Radaza.

Mapupos na sab karong tapos sa buwan ang kontrata sa kapin 1,900 ka JOs ug nameligro nga pulihan sa bag-ong administrasyon ug wa nay trabaho, gianggaan og “TamJones” (taman nalang sa June).

Giam-aman ni Radaza ang maong mga kawani nga mosuway lang gihapon sa pag-apply sa pamunoan ni Chan sa pamasin nga mapili-an o dawaton ilabi na niadtong nailhan nga mga kugihan.

“Nakadungog kog istorya, istorya ra pud nga dili man kuno taktakon ang kawani kay mo-agi pa man og assessment sa bag-ong mayor (kon angayan bang dawaton og balik),” pamahayag ni Radaza.

Sa laing bahin, malaumon si Radaza nga matukod ang P80 milyones nga Arts and Design Building nga maoy magsilbing training grounds niadtong 11 ka mga magtutudlo nga scholars sa siyudad nga nagtungha sa Taiwan sud sa duha ka tuig.

“So karon unsaon nato og apply ang ilang (scholars) nakat-unan for two years? The school board allotted P80 million for the construction of the building ngadto sa Looc High School,” pasabot sa umaabong nga kongresista.

Dugang niya nga kuwang na lang ang pagpasubasta sa maong proyekto ug nahan-ay na alang sa pagpatuman. (FVQ)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph