HUMAN rondaha sa National Bureau of Investigation 7 ug Regional Special Operations Group 7 ang buhatan sa Kapa (Kabus Padatuon) Community Ministry International Incorporated niadtong Hunyo 10, mga miyembro gisaaran sa kadagkoan sa kapunongan nga di sila mabalaka kay ulian sa “donasyon.”
Matod ni Gwen (tinuod nga ngan gipugngan), kinsa naka-”donate” og P1 million sa Kapa, nga gisaaran siya sa usa sa mga agent niini nga pahulaton silag 10-15 ka adlaw una pa sila makakuha sa ilang donasyon.
Nakasabot ra usab siya sa habig sa Kapa sanglit gipugngan pa sa Securities and Exchange Commission (SEC) ang bank accounts ni Pastor Joel Apolinario, founder sa Kapa, diin adunay kapin sa P100 million.
Kasamtangan nga gihunong ang pagpanghatag sa love gift sa Kapa niadtong mga miyembro sa lungsod sa Compostela.
Gawas nga gisunog ang ilang opisina, nimando usab si Apolinario sa ilang kadagkuan.
Gipasabot ni Gwen sa Superbalita Cebu nga di na siya mokuha sa tubo sa iyang P1 million nga gi donate basta mabalik lang ang capital.
“Ang amoa ra man giapas nga iuli lang nila if ever i-freeze gyud ang tanang account. Okay ray walay tubo,” matod ni Gwen.
Wa usab siyay plano nga mokiha sa Kapa sanglit wa siyay rason nga ikiha ang kapunongan nga nakatabang sa kina bag-ang kabus.
Naluoy lang siya sa mga wa maka love gift kay naatlan nga gipangronda sa NBI ug kapulisan.
Wa siya wad-i sa paglaom nga mabalik ra ang iyang kwarta tungod kay nakig-alayon kaniya ang agent sa Kapa pinaagi sa tawag sa cellular phone.
Makadungog usab sila sa tingog ni Apolinario nga nangayo og pagsabot nga nahunong ang ilang operation tungod sa pasangil nga si Pastor Apolo Quiboloy ang nagpaluyo niining tanan.
“Wala man koy reason nga mag-file og case nga di man siya ang nagbinuang tungod lang kay naay koan ni Quiboloy. Gitarong sad baya mi ni Pastor Apolinario. Wala gyud mi gipabayaan,” dugang ni Gwen.
Organico
Samtang ang nakapalit og mga baktin sa Organico Agribusiness Ventures Inc. nabalaka na human nga way gihatag nga tagal kon kanus-a mabalik ang ilang na invest nga kwarta.
Si Rhandy (tinuod ngan gipugngan), kinsa nakapalit og 10 ka baktin balor og P36,000 nga karong Agosto unta maka payout, wa na masayod unsay plano sa Organico.
Matod niya nga iyang gi chat ang iyang agent apan gi-seen zone ra siya niini hinungdan nga nabalaka na siya nga basin di na siya maulian sa iyang capital.
Ang P36,000 nga iyang capital maka payout na siya og P60,000 inig tapos sa Agusto.
“Ang akong problema, Sir, kay gi seen zone ra ko sa chat. Mao na akong gikaproblemahan ba kay wala may abiso nila oi,” matod ni Rhandy.
Bisan pa man nga aduna na siyay pagduha-duha nga mabalik pa ang iyang kwarta positibo pa siya nga sa Agusto makuha niyag balik ang P36,000.
Gisuwayan pagkuha sa ilang habig ang Organico apan nagdumili kini pagluwat sa bisan unsa nga pamahayag.