WA NAY sagabal ang dagan sa mga sakyanan paingon sa sud ug gawas sa underpass sa Barangay Mambaling, Dakbayan sa Sugbo.
Kini ang paghulagway ni Francisco Ouano, operations chief sa Cebu City Transportation Office (CCTO) sa Lunes, unang adlaw sa tingtrabaho sa semana ug pagbukas sa klase sa pipila ka pribadong mga tunghaan.
“Nakita nato ganinang buntag( gahapon) nga hapsay ra gyud kaayo. Naa lay nakabara kaning mga eskwelahan nga magpakanaog ug magpasakay sa mga estudyante. But beyond ana, wa natay nakita nga problema kay hapsay ug lahoslahos na ang dagan sa mga sakyanan,” matod ni Ouano.
Giangkon sa opisyal nga makasinati gihapon og kahuot sa dagan sa sakyanan kadtong mopaingon sa south sa mga lugar diin adunay mga eskwelahan.
Kini sama pananglit sa N. Bacalso Ave., duol sa Salazar Institute of Technology (SIT), Cebu Institute of Technology (CIT) University, Mambaling Elementary School ug University of San Jose Recoletos (USJR).
Apan ang mga sakyanan nga gikan sa Pardo area padung sa Cebu City hamugaway ang ilang pag-agi sa underpass.
Giklaro ni Ouano nga makasinati gihapon og kahuot sa trapiko sa dapit hilabi na sa peak hours gumikan sa gidaghanon sa sakyanan.
Iyang gibana-bana nga moabot og 5,000 ka mga sakyanan ang moagi panahon sa weekends ug mo-doble sa weekdays ang moagi sa underpass.
Truck Ban
Ang CCTO hugot nga nagpatuman sa truck ban.
Gidili ang pag-agi sa dagkong mga sakyanan gikan alas 6 hangtod alas 8 sa buntag ug alas 4 sa hapon hangtod alas 7 sa gabii.
Gidid-an sa CCTO nga makaagi sa underpass ang mga mini bus ug bus de pasaheroan sanglit kon tugotan sila, ang gibanabana nga 600 ka units maoy makabara sa trapiko.
Apan ang mga taxi, PUJ ug v-hire makaagi sa underpass.
Kadtong moadto sa Punta Princesa ug Labangon, adto sa ibabaw moagi. (PAC)