Thrilla in Davao: Johnson gibukbok si Farah

SI RONALD "The American Dream" Johnson mibukbok og maayo, miguwang madaugon kontra Saul "The Phoenix Assassin" Farah sa Bolivia aron maangkon ang bakanteng Global Boxing Organization (GBO) World heavyweight championship title via unanimous decision sa The Enderun Tent, Azuela Cove sa Lanang, Davao City, Dominggo sa kadlawon.

Si kanhi Former World Boxing Council United States (USNBC) light heavyweight champion Johnson, 33, nga nauna ng mitagna nga molukapa si Farah sa second round mi-target sa panga sa South American heavyweight champion, miiskor og duha ka knockdowns sa first round.

Daghan ang naglaum nga masundan pa kini, apan maisugon si Farah, gisagang ang mga kumo ni Johnson nga misarasay na sa second round.

Mga hurado miiskor og 118-108, 120-106 ug 116-110, tanan pabor kang Johnson diin ang rekord milambo ngadto sa 16 ka daug, usa ka draw ug way pildi, samtang si Farah may 69-3-24.

"I really tried to knock him out as I said but I just couldn't. My hats off to Saul for being such a great fighter," suma sa bag-ong world champion human gitunol kaniya ang iyang bakus ni kanhi Senator Ferdinand "Bongbong" Marcos Jr., Games and Amusement Board (GAB) chairman Abraham Mitra ug Red Boxing International chairman Rey Rodis atol sa per invitation event.

Anaa sab si Cong. Anton Lagdameo Jr. atol sa awarding.

Samtang sa supporting main events, si Aries Buenavidez milangkat sa bakanteng GBO Asia-Pacific Youth bantamweight championship title via unanimous decision win kontra Roy Nagulman sa Ifugao samtang ang taga Davao City nga si Joe Tejones midaug sa GBO-Asia Pacific junior lightweight championship title human gipildi si KJ Natuplag sa Bukidnon via split decision.

Sa undercard, si Orlie Selvestre mipildi ni Jenuel Lausa via unanimous decision sa ilang eight-round 113 lbs. Si Reymark Ebones mipukan ni Royder Borbon sa six-round 113 lbs.

Sila Gabriel Dasan ug Nilo Entero misampot sa technical split draw sa four-round 109 lbs nila nga bugno.