SI NATIONAL Prisaa Games 2019 double gold medalist Arlan Arbois Jr. maoy kampeyon sa 1st Surigao del Sur International Half Marathon Dominggo, Hunyo 16, sa Tandag, Surigao del Sur.
Ang 22-anyos nga si Arbois, fourth year Criminology student sa Rizal Memorial Colleges (RMC), mipildi sa taga-Davao City nga si Elmer Bartolo ug taga-Iligan City nga si Miller Neri nga mitapos sa ikaduha ug ikatulong pwesto.
Si Arbois, sa Facebook interview, nagkanayon nga wa gyud siya maglaum nga siya'y manguna sa lumba.
Suma niya miuli siya sa Tupi, South Cotabato human makakolekta og duha ka bulawan sa National Prisaa Games 2019 men's 5,000-meter run ug 10,000m run ug silver sa 1,500m.
"Nagbakasyon ko sa amoa wala koy training human sa Prisaa. Nakatraining ko one week lang usa ang lumba sa Tandag. Pero bisag wala koy klarong training, gi-try lang gihapon nako akong best if makaya ba nako ug nag pray pud ko kay God na makaya lang nako ang 21K og maging safe," suma sa atleta.
Ang marathon may 3km, 5km, 10km ug 21km nga kategoriya.