ARON maseguro nga walay mabiktima nga katawhan sa Davao Region batok niining mga text scammers, ang Police Regional Office (PRO)-Davao hugtanong nagpahimangno nga gilayong i-report kung makasinati ang susama sa ingon.
Niining bag-o lang, nasayran nga gigamit ang pangalan ni PRO-Davao Director Marcelo Morales sa usa ka pagpangilad pinaagi sa text messaging.
Sumala sa ahensya nga dunay mga nagkatag nga mga mensahe gamit ang cellphone sa pamaagi sa "pagpangilkil" diin gigamit ang pangalan ni Morales ug pangalan sa ubang mga dagkong opisyal sa kapulisan sa Davao
Region.
"With this, PRO-Davao Region would like to inform that Police Brigadier General Morales did not authorize anyone to use his name and refutes this hoax text messages spreading online as malicious," tipik sa pamahayag sa PRO-Davao Region.
Tungod niini, gipahimangnoan sa kapulisan ang katawhan nga gilayong mosumbong sa pinakaduol nga buhatan sa pulis kung makadawat og mensahe sa pagpangilkil aron gilayon kining maaksyonan.
"Report immediately to the nearest police stations or through PRO-Davao Region Hotline Number (0998-598-7026), our social media account (Pulis Rehiyon Onse 11)," sumpay sa pahimangno sa kapulisan sa rehiyon.
Kini ang panahon nga magamit na gayod pag-ayo ang Cybercrime unit sa Philippine National Police (PNP) sa Davao Region.
Hitsas man tingali ang tanang moderno nga kagamitan sa maong unit, walay rason nga dili masubay kinsay mga nagpaluyo niini nga modus.
Kinahanglan mapabilin ang morale sa kapulisan kay sila ang tigbantay sa pagpabilin sa kahapsay ug kalinaw, sila ang modelo sa katawhan ug sila ang tigpasunod sa balaud.
Angay lamang nga limpyo ang ilang panerbisyo, busa husto kining gihimo karon sa PRO-11, sa sayo nga pagpasayod ug sa paghatag sa direkta nga hotline aron makasumbong dayon sa kanila.
Magtinabangay kita, aron walay mabiktima.