BLANGKO pa ang kapolisan pag-ila sa mga suspetsadong nangarnap ug nipatay sa usa ka habal-habal driver niadtong Sabado mga alas 1:00 sa kadlawon sa Balulang ning siyudad sa Cagayan de Oro.

 

Si Police Officer 1 Jenny Ubanan sakop sa City Intelligence and Detective Unit niila sa namatay nga mao si Arnel Musi, 47, taga Labuena, Grand Europa, Lumbia ning siyudad.

 

Gibutyag ni Ubanan sa Sun.Star Superbalita nga panginabuhian ni Musi ang pagpamasayro matag gabii gamit ang XRM motorsiklo nga kolor pula.

 

Nasayran nga namatikdan pa ang biktima sa Gaston park nga bahin mga alas 12:00 sa gabii ug adunay duha ka mga lalaking pasahero nga nagpahatod sa Balulang nga bahin.

 

Sa tinguhang makakwarta aron i-abag sa pamilya gihatod sa biktima ang duha ka mga lalaki apan sa Balulang na lamang nakitang nagbuy-od ug wala nay kinabuhi ang biktima ug wala na ang motorsiklo niini.

 

Usa sa mga residente sa dapit ang nakadungog og buto ug misibat nga motorsiklo hinungdan nga gisusi ug nasutang gipusil ang biktima sa tangkugo nga bahin nga milahos sa atubangan niini.

Miresponde ang kapolisan sa Police Station 4 sa Carmen ug nahipos gikan sa crime scene ang usa ka basyo sa bala sa gituohang kalibre .45.

 

Gituohang pagpangarnap ug pagpanulis ang motibo sa pagpamusil tungod kay lakip sa nawala ang kwarta nga kita sa pamasayro.

 

Matud ni Ubanan nga padayon pa ang paghimo og imbestigasyon kalabot sa hitabo aron masikop ang mga suspetsado nga walay nakatumbok kung unsay hitsura.

 

Si Musi ang ika upat nga habal-habal driver nga gikuhaan og motorsiklo ug gipatay. (Stephanie V. Berganio)