DUNAY mga nangutana kun kinsay tinuod nga gikampanya ni Comval Governor Arturo "Chungkee" Uy pagka presidenti karon-- si Gibo Teodoro ba o si Manny Villar? 

Si Governor Uy maoy opisyal nga kandidato sa Lakas-Kampi CMD sa Compostela Valley Province. Apan luyo niini dunay mga natahap nga sama sa duol sa iyang dughan si Villar. Tinuod kaha ni?

Mao usab kini ang samang pangutana nga maayong ipatubag sa iyang igsuon nga si Tagum City Mayor Rey "Chiong" Uy.

Kun maghimo og loyalty check ang Lakas-Kampi-CMD siguradong matubag kini aron mahayagan ang hunahuna sa katawhan.

Sa laing bahin, tinuod kaha usab ang balita nga si Emily Alvarez, kandidato pagka kongresista sa unang distrito sa dakbayan sa Tagum nangampanya alang ni Jojo Binay pagka besi presidenti sa Pwersa ng Masa ug dili sa kandidato sa iyang partido nga Nacionalista Party nga si Loren Legarda?

Maayo matubag ni Mrs. Alvarez kun tinuod kining mikatag nga balita nga atol sa tapok-tapok uban sa iyang mga lider nga nagagikan sa New Corella sa miaging semana didto sa Molave Hotel, iyang gipahibawo sila nga ang iyang kandidato pagka besi presidenti mao si Binay.

Tungod niini, dunay mga nanggawas nga taho nga buot usab nato ipatubag karon kang Ginang Alvarez. Sumala sa balita nga wa pa maalim ang samad sa dughan sa magtiayong Alvarez sa gibuhat ni Loren Legarda kaniadto nga pag-demand nga mapahawa sa iyang puwesto si Abogado Pantaleon " Bebot" Alvarez, bana ni Emily, isip kalihim sa Department of Transportation and Communication tungod sa gikabaniog nga Piatco-Wintrack scandal.

Kun tinuod kini nga alegasyon ug kun masayud si Loren, tingali mangita gyud siya og paagi nga mapakgang ang giingong gihimo ni Ginang Alvarez? 

Tungod kay wa man kita'y dautang tumong dinhe, buot namo dapiton si Ginang Alvarez nga bukas kining atong column sa Sun Star Superbalita aron hatagan siya og higayon nga matubag kini nga mga pasangil kaniya.

(Suaybaguio batok Israel)

Nagtigi karon pagka besi gobernador sa lalawigan sa Tagum, Davao del Norte sila si incumbent vice governor Baby Suaybaguio ug ang beteranong broadcaster ug board member Rogelio "Roger" Israel.

Sa panahon ni Suaybaguio, maayo ba ang iyang binuhatan? Sa laing bahin, dugay na sab nag-alagad si Roger sa Tagum isip magsisibya, konsehal ug board member. Sa inyong tan-aw (taga-Davao del Norte) maayo bang pulihan na si Suaybaguio?