PHILIPPINE Drug Enforcement Agency 7 nipahibawo nga wa pa makasulod sa Pilipinas ang strawberry quik, usa ka matang sa illegal nga drugas nga daw sama sa candy nga makaingganyo sa mga bata sa sulod sa tunghaan.
Apan wa sila mokompyansa, ang PDEA nag-monitor sa mga tunghaan.
Nikatap na usab karon ang mensahe pinaagi sa Facebook nga nag awhag sa mga ginikanan nga bantayan ang ilang mga anak tungod sa pagkuyanap sa mga tunghaan sa bag-ong matang sa illegal nga drugas nga gitawag nilag strawberry quik nga nauso sa gawas sa nasud.
Ang giingong illegal nga drugas sama sa usa ka candy apan kon ang bata makakaon niini, mawad-an kini sa maayong panimuot.
Apan matod ni Leia Alcantara, information officer sa PDEA 7, nga wa pay na-monitor ang ilang buhatan nga aduna na sa Pilipinas ang maong matang sa illegal nga drugas sanglit wa pa silay nasakmit.
Bisan pa man sa maong kasayuran, matod ni Alcantara nga wa sila mokompyansa pinaagi sa pagpahimangno sa mga ginikanan nga angay gihapon nga bantayan nila ang ilang mga anak.
“Wala pay nakasulod nga mga bag-ong klase sa drugas diri sa nasud apan dili ta mo kompyansa gihapon,”matod ni Alcantara.
Ang pagpanghadlok kalabot sa giingong strawberry drugs nagsugod pa niadtong 2007 pinaagi sa internet.
Nabuhi kini og balik niadtong 2012 pinaagi sa Facebook, diin ang mga mensahe gibutangan og substance nga kolor og pink.
Ang mensahe nga gihulagway nga "hoax"kun di tinuod nabalikbalik sa pagpasawo, apan matod sa mga awtoridad sa mga nasod diin kini nikatap nga di kini tinuod.
Wa pay bisan usa ka kaso nga nasusi nga nagmatuod nga tinuod nga naa ang mao nga matang sa drugas.
Matag bukas sa klase motumaw kining mao nga taho.
Pabilin nga ang shabu ug marijuana pa gihapon ang nag una nga matang sa illegal nga drugas nga mahimong makasulod sa mga tunghaan, matod sa PDEA.
Wa wad-a sa PDEA 7 ang posibilidad nga ning pagbalik na sa klase sa mga pribado ug publikong mga tunghaan, makasulod ang maong mga matang sa illegal nga drugas tungod kay ang mga estudyante ang target sa mga durugista.
“Dili lang ta mokompyansa mao nang among giawhag ang mga ginikanan nga continues lang gihapon ang monitoring especially kining mga drugas nga ato nang nailhang mga shabu, marijuana kay posible gyud kaayo nga naay makasulod nga mahimong targeton kining atong mga eskwelahan ug atong mga estudyante,” dugang ni Alcantara.
Sunod semana tinguha sa PDEA nga mosuroy sa mga eskwelahan aron edukahon ang mga tinun-an lakip na ang mga ginikanan nga mahimo nang adik sa paggamit sa illegal nga drugas.