SECTIONS
Thursday, July 18, 2019
SUPERBALITA CEBU

Diputado: ‘Gubot pa sa lukot’

Cuentas claras

KINSAY angay tuhoan, ang Kapitan o ang Kusinero sa barko nga matod pa, gidasmagan sa mga Insik didto sa West Philippine Sea?

Matod sa Kapitan, gituyo pagdasmag ang ilang sakyanan sa mga Insik.

Matod sa Kusinero, natulog ang Kapitan sa wala pa ang aksidente og siya gani ang nagpukaw niini.

Unsay gisulti sa Kusinero?

Miingon ang Kusinero nga posible nga wala tuyoa ang pagdasmag kay basin og wa kakita ang mga Insik sa ilang sakyanan.

Kon tuhoan ang gisulti sa Kapitan, gituyo gyod diay sa mga Insik ang pagdasmag sa ilang sakyanan og maoy nakaingon nga nalunod kini.

Pero ang pangutana – giunsa man niya pagkahibalo nga gituyo?

Bugtong ang mga Insik lang ang nahibalo niini og imposible nga makabalo ang Kapitan sa ilang giplano nga buhaton.

Kon tuhoan sab ang gisulti sa Kusinero, mogawas nga posible nga wala tuyoa ang pagdasmag og aksidente lang kini kay wala makit-i sa mga Insik ang ilang sakyanan sa wala pa kini bangga-i.

Dugang pangutana – kinsa sa Kapitan ug sa Kusinero ang dunay dakong panahon sa pagtimbang-timbang sa wala pa ang pagbanggaay?

Matod sa Kusinero, siya lang ang nagmata niadtong panahona kay nangatulog ang tanan niyang mga kauban, apil na ang Kapitan.

Siya ang unang nakakita sa nagsingabot nga sakyanan sa mga Insik og maoy hinungdan nga gidagan niya ang Kapitan og gisultian niini.

Bisan pa sa paningkamot sa Kapitan nga padaganon ang ilang sakyanan, ulahi na ang tanan kay naabtan na man sila sa sakyanan sa mga Insik og nabanggaan gyod.

Sa minais nga pagkasulti, normal ang panghuna-huna ug ang gibuhat sa Kusinero sa pagpahibalo dayon sa Kapitan. Pero ang Kapitan, gikan natulog ug kulang na sa panahon sa paghuna-huna sa angay buhaton.

Gani maingon pa nga nag-panic kini.

Balik sa pangutana – kinsa may katuhoan nilang duha, ang Kapitan o ang Kusinero?

Kon tan-awon kini pag-ayo, lisod kining kasoha.

Una, dunay lain-laing bersiyon ang grupo sa mga Pinoy nga mga mangingisda.

Ikaduha, posible sab nga magkalahi ang bersiyon sa mga mangingisda nga Pinoy og sa mangingisda nga mga Insik.

Kinsa may katuhoan sa mga nagkadaiyang bersiyon?

Duna pay laing problema.

Dis-a man dapita kini mahitabo?

Kinsa may dunay “jurisdiction” niini, ang Pilipinas o ang China?

Kon angkonon sa Pilipinas, motuo kaha ang China niini?

Kon angkonon usab sa China, motuo ba ang Pilipinas niini?

Kon di magkasinabot ang China ug ang Pilipinas, andam ba ang kagamhanan sa nasod nga modangop sa UNCLOS?

Pasabot, laing kaso na sab sa Pilipinas batok sa China.

Pwede ba kini karong mga panahona?

Mao kini ginaingon nga gubot pas lukot.

Dunay nangutana.

Nganong didto man sab managat ang mga Pinoy nga mga mangingisda nga nasayod man sila nga gubot kaayo ang maong lugar?

Nasayod sila nga giilogan pa ang maong lugar sa Pilipinas ug sa China.

Hasta ang Vietnam miangkon sab nga ila ang maong lugar.

Gani, mao kini hinungdan nga dunay mga Insik, mga Vietnamese ug mga Pinoy nga managat didtong dapita kay daghan og isda.

Pasabot, nasayod na daan ang mga mangingisda nga posible nga dunay kagubot nga mahitabo tungod sa pag-angkonay sa mga lain-laing nasod sa maong lugar.

Mao kini giingon nga samtang nanagat sila og isda sa maong lugar, nanagat sab sila og kagubot sa maong lugar.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph