PIPILA ka adlaw human gideklarar sa Philippine Atmospheric, Geophysical and Astronomical Services Administration (Pagasa) ang panahon sa ting-uwan, gipahibawo na usab sa Metropolitan Cebu Water District (MCWD) nga aduna na'y kalambuan ang Buhisan Dam.
Niadtong Martes, Hunyo 18, 2019, nakasupply na kini og 2,000 cubic meters human sa kusog nga uwan nga nasinati sa Sugbo.
Gipahibawo usab sa MCWD nga nisaka na ang supply sa Jaclupan Facility.
Ang tigpamaba sa MCWD, Charmaine Rodriguez-Kara nibutyag sa Superbalita Cebu nga human sa pipila ka buwan nga wala magamit ang Buhisan dam, nahibalik na kini ug nakasupply na og 2,000 cu.m. nga tubig.
Malaumon usab sila nga mosaka pa kini sa pipila ka semana karon nga grabe na ang uwan.
Anaa sa 7,000 cu.m. ang kapasidad sa maong dam diin makasupply kini og 6,000-7,000 ka panimalay o pamilya.
Samtang ang Jaclupan Facility niabot na sa 27,000 cu.m. ang masupply niini diin duol na kini sa 33,000 cu.m. nga naandan nga kapasidad niini.
Dugang ni Kara nga anaa na sa 229,000 cu.m. ang sumatotal nga produksyon sa MCWD diin anaa sa 238,000 cu.m. ang inadlaw nga demand niini.
Malaumon usab sila sa MCWD nga mahibalik na sa kapasidad nga lebel ang duha ka pasilidad aron maminusan na ang reklamo sa supply sa tubig.
Niadtong Biyernes, Hunyo 14, dihang gideklarar na sa Pagasa ang pagsulod sa habagat season o ang ting-uwan.
Bisan paman nga nagpadayon ang weak El Niño phenomenon apan gilauman ang normal nga rainfall sugod karong buwan sa Hunyo. (Superbalita Cebu)