GISUGDAN na sa Commission on Election (Comelec) sa probinsya sa Davao del Sur ang pagsita sa mga lokal nga kandidato nga nagbutang na og posisyon nga ilang gidaganan sa piliay karong Mayo.

Didto sa dakbayan sa Digos, makit-an na sa mga nag-unang kadalanan ang mga nagkatag nga posters sa national candidates ug ilawom niini ang mga local candidates nga nagbutang gyud og posisyon nga ilang gidaganan.

Sama sa mga kandidatong sila si Councilor Josef Cagas ug Al Almendras nga nidagan pag-mayor, Councilor Romualdo Crispino, nga nidagan pagka-bise mayor ug Rey Ayo pagka-board member.

Apan si Crispino nilimod nga nagsugod na sila sa ilang kampanya kay alang niya usa lamang kini ka information drive material aron hinumdumon siya sa mga botante.

"Ing-ani man gud ni siya kung nay maunang isa so manelos ang usa mao nga di paalkanse so magpapilit og iyang poster," ni Crispino pa.

Apan wa mituo sa ilang mga rason ang Comelec sanglit tataw nga kalapasan kini sa normal nga pagsugod sa kampanya karong Marso 26.

Si Assistant Provincial Election Supervisor Edgardo Sadili, nagsulti nga pagpangampanya na kini.

"Nia na ta sa election period, gibawal gyud namo na kay kanang moingon nga nagpapili pagka mayor or vice mayor nangampanya na na sa iyang kaugalingon," ni Sadili.

Nagpahinumdum ang Comelec ngadto sa mga kandidato nga ang sayong pagbutang og posisyon sa ilang mga posters usa ka paglapas sa seksyon sa Comelec resolution 7767 ug aduna kini silot sa usa kandidato pinaagi sa pagka-diskwalipikang modagan.

Matod sa Comelec nga magpadala sila og notisya alang niadtong mga kandidatong naguna-una na sa kampanya ug aron pahibaw-on sab kung asang dapita ang mga common poster area.

Apan sa gihimo sa ubang mga kandidato nga buot molamang sa ilang mga kaatbang nanawagan karon ang mga nagpakabanang sektor nga dili sila botohan sanglit wa pa gani nabutang sa pwesto nagpakita na sa ilang tinuod nga kolor nga mao ang pagpamintaha sa uban. (Orlando B. Dinoy)