ANG Davao City bowler Tessa Dianne Galendez-Lim mikolekta og upat ka pasidungog sa pagtapos sa 1st Cebu International Invitational Tenpin Bowling Championships 2019, Dominggo sa SM Bowling Center, Cebu City.
Ang two-time SM Millionaire’s Cup titlist maoy kampeyon sa singles ladies, ikaduha sa Ladies Masters category, ikatulo sa Open Masters division ug ikatulo sa Associate Masters event.
Ang 25-anyos nga Dabawenya mipauli og cash prize nga P169,000 sa iyang unang national tournament comeback sukad siya naminyo ug nanganak sa unang baby, ang 13 ka bulang si Vince Dean nga miuban sab kaniya sa Cebu.
“I am so thankful because I did not expect to win since I have lesser time for practice because I am a full time mom,” suma niya sa SunStar Davao.
Dugang niya, “It’s harder for me now that I am a mother compared to when I was single because during the game, whenever I have spare time, I breastfeed my son. But with the support of my husband and my parents, it’s easier for me to be a bowler while being a mother.”
Si Galendez-Lim, nga kasamtangang naka-base sa Bansalan, Davao del Sur, gibiyaan ang trabaho sa bangko ug mibalik sa pakigkontest sa bowling niadto lang Marso, diin midaug siya og titulo sa Davao Tenpin Bowlers Association (Datba)-organized weekly tournament.